Local Body Election : राज्य सरकारनं नगर परिषद आणि नगर पंचायत निवडणुकीच्या नियमांत मोठा बदल करायचं ठरवलंय. आज हे सुधारणा विधेयक विधिमंडळात मांडलं जाणार आहे. या निर्णयामुळे स्थानिक राजकारणात मोठी हलचल होण्याची शक्यता आहे.
नव्या नियमानुसार आता एकच माणूस एकाच वेळी अध्यक्ष आणि सदस्य अशा दोन जागांवर निवडणूक लढवू शकणार आहे. एवढंच नाही तर दोन्ही ठिकाणी जिंकला तर त्याला दोन्ही पदं एकत्र ठेवता येणार आहेत. आधी असं झालं तर एक पद सोडावं लागायचं, पण आता तसं करावं लागणार नाही.
मतदानाबाबत मात्र एक अट आहे. तो व्यक्ती सदस्य म्हणून फक्त एकदाच मतदान करू शकेल. पण जर मतदानात सत्ताधारी आणि विरोधकांची मतं बरोबरीत पडली, तर अध्यक्ष म्हणून त्याला ‘निर्णायक मत’ देण्याचा अधिकार असणार आहे. म्हणजे शेवटचा निर्णय त्याच्याकडे जाऊ शकतो.
या निर्णयामुळे विशेषतः लहान नगर पंचायतांमध्ये अध्यक्षांची ताकद वाढणार आहे, असं बोललं जातंय. त्यामुळे स्थानिक पातळीवर काही नेत्यांचं वर्चस्व आणखी मजबूत होऊ शकतं. आता विरोधक या विधेयकावर काय भूमिका घेतात, हे पाहणं महत्त्वाचं ठरणार आहे.
