पुणे : मुंबई आणि बंगळुरू दरम्यान धावणाऱ्या बहुप्रतिक्षित ‘स्लीपर वंदे भारत एक्स्प्रेस’चा प्रस्तावित मार्ग, वेळापत्रक आणि थांबे रेल्वे बोर्डाने स्पष्ट केले आहेत. ही नवी वेगवान ट्रेन सोलापूर मार्गे चालवण्याचा प्रस्ताव असल्याने सोलापूरकरांमध्ये उत्साहाचे वातावरण आहे. मात्र, ही ट्रेन मिरज-बेळगावी मार्गे जावी अशी मागणी करणाऱ्या पश्चिम महाराष्ट्रातील कोल्हापूर, सांगली, सातारा आणि कर्नाटकातील बेळगाव भागातील प्रवाशांमध्ये तीव्र नाराजी पाहायला मिळत आहे.
1137 किलोमीटरचे हे अंतर ही स्लीपर वंदे भारत ट्रेन साधारण 15 ते 16 तासांत पूर्ण करेल. या प्रवासात छत्रपती शिवाजी महाराज टर्मिनस (CSMT मुंबई), कल्याण, पुणे, सोलापूर, कलबुर्गी, वाडी, रायचूर, गुंतकल, अनंतपूर, धर्मावरम आणि केएसआर बंगळुरू या मुख्य स्थानकांवर गाडीला थांबे देण्यात आले आहेत.
आठवड्यातून दिवस धावणाऱ्या या पूर्णपणे वातानुकूलित (AC) ट्रेनचे प्रस्तावित वेळापत्रक खालीलप्रमाणे आहे:
ट्रेन क्र. 27651 (मुंबई ते बंगळुरू): मुंबईवरून दुपारी 2.50 वाजता सुटून दुसऱ्या दिवशी सकाळी 10.30 वाजता बंगळुरू येथे पोहोचेल (मंगळवार वगळून).
ट्रेन क्र. 27652 (बंगळुरू ते मुंबई): बंगळुरूहून रात्री 10.00 वाजता निघून दुसऱ्या दिवशी दुपारी 1.50 वाजता मुंबई सीएसएमटी येथे पोहोचेल (सोमवार वगळून).
तिकीट दर आणि सुविधा
या गाडीत 1- टियर एसी, 2- टियर एसी आणि 3-टियर एसी असे प्रवास वर्ग असतील.3-टियर एसीचे भाडे साधारण 2200 ते 2500, 2-टियर एसीचे 3200 ते 3600 तर फर्स्ट एसीचे भाडे 4000 ते 4500 दरम्यान असण्याचा अंदाज आहे.
या नवीन मार्गामुळे मुंबई, पुणे आणि सोलापूरच्या प्रवाशांना बंगळुरूपर्यंतचा प्रवास अधिक जलद आणि आरामदायक होणार आहे. रेल्वे प्रशासनाकडून या प्रवासाचे अधिकृत भाडेपत्रक लवकरच जाहीर केले जाईल.
