पुणे : शिंदेसेनेचे आमदार संजय गायकवाड यांनी महिलांच्या शारीरिक ठेवणीवर जाहीरपणे केलेल्या वादग्रस्त वक्तव्यामुळे त्यांच्या अडचणी वाढल्या आहेत. याप्रकरणी त्यांच्याविरोधात बुलढाणा शहर पोलीस ठाण्यात मध्यरात्री गुन्हा नोंदवण्यात आला असून या घटनेने महाराष्ट्राच्या राजकीय वर्तुळात मोठी खळबळ उडाली आहे.
चिखली मतदारसंघाच्या भाजप आमदार श्वेता महाले यांचे पती विद्याधर महाले यांच्या वाढदिवसानिमित्त बुलढाण्यात एका रॅलीचे आयोजन करण्यात आले होते. या रॅलीत “बाप तो बाप रहेगा…” हे गाणे वाजवले गेले. या गाण्याबाबत प्रतिक्रिया विचारली असता, आमदार संजय गायकवाड यांनी महिलांच्या शरीराबद्दल उपहासात्मक आणि अनुचित भाष्य केले. तक्रारदाराच्या मते, पुरुषाने हे बोलणे ठीक आहे पण स्त्रीने असे म्हटल्यास ती बापासारखी शारीरिक ठेवण कुठून आणणार, असा प्रश्न उपस्थित करत आमदारांनी अयोग्य हातवारेही केले.
आमदार गायकवाड यांच्या या विधानाचा व्हिडिओ सोशल मीडियावर वेगाने पसरल्यानंतर नागरिकांमधून तीव्र संताप व्यक्त करण्यात आला. हे वक्तव्य संपूर्ण महिला वर्गाचा अवमान करणारे आणि मानहानीकारक असल्याचे सांगत रामदेव बाबा नगर येथील 42 वर्षीय महिला सविता भगवान बेंडवाल यांनी पोलिसांत तक्रार दाखल केली. या कृत्यामुळे मानसिक त्रास झाल्याचे त्यांनी अर्जात नमूद केले.
या अर्जाच्या आधारे बुलढाणा शहर पोलिसांनी 12 सप्टेंबर 2026 रोजी मध्यरात्री भारतीय न्याय संहिता (BNS), 2023 च्या कलम 79 अंतर्गत गुन्हा दाखल केला आहे. या प्रकरणाचा पुढील तपास महिला पोलीस उपनिरीक्षक सुषमा पाटील करत आहेत. लोकप्रतिनिधीवरच थेट पोलीस कारवाई झाल्याने बुलढाण्यातील राजकीय वातावरण तापले असून पोलीस आता काय पाऊल उचलतात, याकडे सर्वांचे लक्ष लागले आहे.
