Raigad News : गुहागर : पेवे ग्रामपंचायतीची विशेष सभा संपल्यानंतर मुंबईहून सुमारे पाच वर्षांनी आलेल्या एका ग्रामस्थाने दोन साथीदारांच्या साहाय्याने पेवे ग्रामपंचायतीमधील दोन महिला सदस्यांना धमकी दिली. ‘मी दाऊदचा माणूस आहे, धावत्या हरणीला मारतो. तुम्हाला मारायला वेळ लागणार नाही. तुमची ही शेवटची सभा आहे’, अशी धमकी दिली.
पेवे ग्रामपंचायतीची विशेष ग्रामसभा संपल्यानंतर सायंकाळी चारच्या दरम्यान आरोपी शौकत महम्मद खान, मुनाफ युसुफ खान व निलेश मुरलीधर कीर (रा. पेवे ता. गुहागर) तेथील दोन महिला सदस्यांना धमकावले. याच महिलांनी याबाबतची तक्रार गुहागर पोलीस स्टेशनमध्ये दिली.
या तक्रारीमध्ये यातील मुख्य आरोपी शौकत महम्मद खान याने आपल्या दोन साथीदारांच्या साहाय्याने महिला सदस्यांना ‘माझे डोके गरम आहे, मी मागेपुढे पाहत नाही, महिला असो की पुरुष असो, मी दाऊदचा माणूस आहे, धावत्या हरणीला मारतो. तुम्हाला मारायला वेळ लागणार नाही’, असे धमकावून अश्लील भाषेत शिवीगाळही केली. याबाबतची तक्रार संबंधित महिलांनी केल्यानंतर त्याच्याविरोधात गुन्हा दाखल करण्यात आला आहे.
