Pune Politics: पुणे: पुणे (Pune) महापालिका निवडणुकीची आचारसंहिता जाहीर झाल्यानंतर शहरातील राजकीय वातावरण तापले आहे. राज्यभरात निवडणुकीसाठी इच्छुकांची धावपळ सुरू झाली असून सर्वच पक्षांत उमेदवारीसाठी चुरस वाढली आहे. महापालिकेतील सर्वात मोठा पक्ष असलेल्या भाजपमध्ये मात्र अनेक माजी नगरसेवकांची चिंता वाढली आहे. भाजपच्या सुमारे 35 ते 40 माजी नगरसेवकांची यावेळी उमेदवारी कापली जाण्याची शक्यता असल्याची चर्चा राजकीय वर्तुळात सुरू आहे. Municipal Corporation elections
हेही वाचा- मोठी बातमी! CM फडणवीसांच्या हत्येचा कट? मुख्यमंत्र्यांच्या सभेआधी गोळीबार; राजकीय वर्तुळात खळबळ
येत्या 23 डिसेंबरपासून उमेदवारी अर्ज भरण्याची प्रक्रिया सुरू होणार असून 31 डिसेंबर ही अर्ज भरण्याची अंतिम तारीख आहे. त्यामुळे पुढील दोन आठवड्यांत सर्वच राजकीय पक्षांच्या उमेदवारांच्या याद्या जवळपास स्पष्ट होणार आहेत. सध्या भाजपकडे उमेदवारीसाठी इच्छुकांची संख्या मोठी असून जवळपास 2500 इच्छुकांनी मुलाखती दिल्या आहेत. त्यामुळे उमेदवारी मिळवण्यासाठी तीव्र स्पर्धा होणार आहे.
2017 च्या महापालिका निवडणुकीत भाजपचे 98 नगरसेवक निवडून आले होते. मात्र यावेळी त्यातील 35 ते 40 नगरसेवकांची तिकीट मिळण्याची शक्यता कमी असल्याचे सांगण्यात येत आहे. यामागे प्रमुख कारण म्हणजे बदललेली प्रभागरचना. नव्या प्रभागरचनेत अनेक जुने प्रभाग एकमेकांत मिसळले गेले आहेत. त्यामुळे काही माजी नगरसेवकांचे प्रभाग बदलले असून त्यांचे राजकीय गणित बिघडले आहे.
याशिवाय प्रभागांतील आरक्षण सोडतीचा मोठा फटका माजी नगरसेवकांना बसला आहे. महिला, इतर मागासवर्ग महिला तसेच अनुसूचित जाती जमाती महिलांसाठी असलेल्या आरक्षणामुळे अनेकांची उमेदवारी अडचणीत आली आहे. काही माजी नगरसेवकांवर कामगिरीबाबत नाराजीही असल्याचे बोलले जात आहे.
दरम्यान, आगामी काळात इतर पक्षांतील काही प्रभावी नेत्यांचा भाजपमध्ये प्रवेश होण्याची शक्यता आहे. त्यामुळे स्थानिक राजकीय समीकरणे बदलणार असून त्याचा फटका काही माजी नगरसेवकांसह इच्छुकांनाही बसू शकतो. त्यामुळे यावेळी भाजपचे सुमारे 40 हून अधिक माजी नगरसेवक निवडणुकीच्या रिंगणात दिसणार नाहीत, अशी माहिती सूत्रांकडून मिळत आहे.
