Pune News: पुणे: पुणे ते छत्रपती संभाजीनगर दरम्यान प्रवास करणाऱ्या नागरिकांसाठी मोठी दिलासादायक बातमी आहे. केंद्रीय रस्ते वाहतूक आणि महामार्ग मंत्री नितीन गडकरी यांनी प्रवाशांसाठी खुशखबर दिली आहे. या दोन शहरांना जोडणाऱ्या नवीन महामार्गाच्या उभारणीची घोषणा केली आहे. या प्रकल्प अत्यंत फायदेशीर ठरणारा आहे अशी माहिती नितीन गडकरी यांनी दिली आहे.
हेही वाचा- मोठी बातमी..! IAS तुकाराम मुंडेंना ‘क्लीन चिट’; ईओडब्ल्यू चौकशीत आरोप निराधार असल्याचे समोर…
नितीन गडकरी यांनी दिलेल्या माहितीनुसार, पुणे ते संभाजीनगर हे अंतर अवघ्या 2 तासांत पार करता येणार आहे. सध्या हे अंतर कापण्यासाठी किमान 6 ते 6.5 तास लागतात. पुणे ते संभाजीनगर हा नवीन एक्स्प्रेस हायवे उभारण्यात येणार असून या प्रकल्पाचा एकूण खर्च 16 हजार 318 कोटी रुपये आहे. या महामार्गासाठी आवश्यक असलेली बहुतांश प्रक्रिया पूर्ण झाली असून सामंजस्य करारावरही स्वाक्षऱ्या झाल्या आहेत. या प्रकल्पामुळे मराठवाडा आणि पश्चिम महाराष्ट्रातील दळणवळण अधिक जलद आणि सुलभ होणार आहे.
या महामार्गात दोन मार्गांचा समावेश असणार आहे. प्रकल्पाचा पहिला मार्ग पुणे, अहिल्यानगर आणि संभाजीनगर असा असणार आहे. हा सध्याचा रस्ता अधिक रुंद व सुरक्षित करण्यात येणार असून काही ठिकाणी नवीन पूल देखील उभारले जाणार आहे. या कामासाठी तब्बल 2 हजार कोटी रुपये खर्च होणार असल्याची माहिती आहे. या मार्गामुळे वाहतुक कोंडीला देखील मोठा दिलासा मिळणार आहे.
दुसरा मार्ग शिक्रापूर येथून सुरू होऊन अहिल्यानगरच्या बाहेरून थेट बीड जिल्ह्यात जाणार आहे आणि तेथून संभाजीनगरशी जोडला जाणार आहे. हा पूर्णपणे ग्रीनफिल्ड महामार्ग असणार आहे. या मार्गासाठीही मोठ्या प्रमाणात निधीची तरतूद करण्यात आली आहे.
या प्रकल्पामुळे वेळ कमी होण्याबरोबरच उद्योग, पर्यटन आणि व्यापारालाही मोठी चालना मिळणार असल्याचे सांगितले जात आहे. पुढील 2 ते 3 वर्षांत हा प्रकल्प पूर्ण होण्याची अपेक्षा आहे.
