अक्षय टेमगिरे
Pune Crime : शिरूर : शिरूर तालुक्यातील कवठे यमाई येथे एका विवाहित महिलेच्या घरात घुसून तिचा विनयभंग केल्याची धक्कादायक घटना समोर आली आहे. याप्रकरणी शिरूर पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, रा. कवठे यमाई, ता. शिरूर, जि. पुणे यांनी फिर्याद दिली आहे. दिनांक 3 एप्रिल 2026 रोजी दुपारी सुमारे दीड वाजण्याच्या सुमारास त्या त्यांच्या घरी एकट्या असताना आरोपी शरीफ उस्मान पिंजारी (रा. कवठे यमाई) हा दारूच्या नशेत घरात घुसला.
यावेळी आरोपीने महिलेचा हात पकडून धमकी देत “तू कोणाला काही सांगितले तर तुला व तुझ्या मुलीला बघून घेईन” असे म्हणत तिची ओढणी ओढली. तसेच अश्लील भाषेत शिवीगाळ करत तिच्या अंगाला हात लावून विनयभंग केला. झटापटीदरम्यान महिलेचे कानातील टॉप्सही पडून हरवले आहेत.
महिलेने आरडाओरडा केल्यानंतर तिचे नातेवाईक घटनास्थळी धावून आले. त्यांना पाहताच आरोपी बजाज डिस्कव्हर एमएच 14 डीएस 1137 या दुचाकीवरून घटनास्थळावरून पसार झाला.
या प्रकरणी शिरूर पोलीस ठाण्यात भारतीय दंड संहितेच्या कलमान्वये गुन्हा दाखल करण्यात आला असून पुढील तपास शिरूर पोलीस करत आहेत.
