LPG Gas Booking : देशभरातील गृहिणींसाठी महत्त्वाची बातमी समोर आली आहे. LPG गॅस सिलिंडरच्या बुकिंग नियमांमध्ये पुन्हा बदल करण्यात आले असून, आता रिफिल बुक करण्यासाठी अधिक प्रतीक्षा करावी लागणार आहे. यापूर्वी 25 दिवसांचा कालावधी होता, तो आता काही ग्राहकांसाठी 35 दिवसांपर्यंत वाढवण्यात आला आहे.
नवीन नियमानुसार, 14.2 किलोच्या घरगुती सिलिंडरसाठी पुढील बुकिंग ही “मागील डिलिव्हरीच्या तारखेपासून” मोजली जाणार आहे. म्हणजेच, तुम्ही सिलिंडर कधी बुक केला याला महत्त्व नसून तो प्रत्यक्ष घरी कधी पोहोचला यावर पुढील बुकिंग अवलंबून असेल. हा बदल विशेषतः डबल सिलिंडर कनेक्शन असलेल्या ग्राहकांसाठी लागू आहे. अशा ग्राहकांना आता पुढील सिलिंडर बुक करण्यासाठी 35 दिवसांची वाट पाहावी लागेल. एकाच सिलिंडरचे कनेक्शन असलेल्या ग्राहकांसाठी ही मर्यादा 25 दिवस ठेवण्यात आली आहे, तर प्रधानमंत्री उज्ज्वला योजनेच्या लाभार्थ्यांना 45 दिवसांचा कालावधी पूर्ण करावा लागणार आहे.
हा निर्णय का घेतला गेला? गॅस कंपन्यांच्या मते, काही ठिकाणी गॅसचा काळाबाजार, डुप्लिकेट बुकिंग आणि साठेबाजी वाढत असल्याच्या तक्रारी होत्या. त्यामुळे वितरण व्यवस्थेत पारदर्शकता आणण्यासाठी आणि गरजूंना योग्य वेळी सिलिंडर मिळावा यासाठी हा बदल करण्यात आला आहे. याचा परिणाम काय? अनेक कुटुंबांना आता गॅसचा वापर अधिक नियोजनपूर्वक करावा लागेल. विशेषतः ज्या घरांमध्ये स्वयंपाकाचा वापर जास्त आहे, त्यांनी सिलिंडर संपण्याआधीच बचत करण्यावर भर द्यावा लागेल.
महत्त्वाची सूचना म्हणजे, ठरलेली मुदत पूर्ण होण्यापूर्वी बुकिंग करण्याचा प्रयत्न केल्यास ती विनंती सिस्टमद्वारे नाकारली जाईल. अधिक माहितीसाठी किंवा तक्रारींसाठी ग्राहक 1800-2333-555 या टोल-फ्री क्रमांकावर संपर्क साधू शकतात.
