Loni Kalbhor blast: लोणी काळभोर, ता. 6 : घरगुती सिलेंडरमधून गॅस गळती होऊन अचानक स्फोट झाल्याची घटना लोणी काळभोर (ता. हवेली) ग्रामपंचायत हद्दीतील नेहरू चौकाजवळील इमारतीत सोमवारी (ता.1) सकाळी साडेदहा वाजण्याच्या सुमारास घडली होती. या स्फोटात भाजून गंभीर जखमी झालेल्या महिलेची मृत्यूशी सुरू असलेली झुंज अखेर पाचव्या दिवशी संपली आहे. उपचारदारम्यान महिलेचा पुण्यातील सूर्या हॉस्पिटल मध्ये आज शनिवारी (ता. 6) सकाळी दहा वाजण्याच्या सुमारास मृत्यू झाला आहे. Loni kalbhor Blast
हेही वाचा- भरधाव वेगाने येणाऱ्या कारची ट्रकला धडक, दोन तरुणांचा जागीच मृत्यू
करूणा मनोज जगताप (वय -44, रा. जगताप हाईट्स, लोणी काळभोर, ता. हवेली) असे मृत्यू झालेल्या महिलेचे नाव आहे. मिळालेल्या माहितीनुसार, करूणा जगताप या घरात एकट्या होत्या. त्यांच्या घरात गॅसच्या दोन टाक्या व गॅस गिझर आहे. परंतु, सोमवारी (ता.1डिसेंबर) सकाळी गॅस गळती होऊन घरात अचानक मोठा स्फोट झाला. दरम्यान दिवाळीला आणलेले फटाकेही घरात शिल्लक राहिले होते. ते ही यावेळी फुटले . या स्फोटात करूणा जगताप या होरपळल्या होती.
हा स्फोट इतका भयंकर होता की, घराचे दरवाजे, खिडक्या तुटून पडल्या. तर घरातील वस्तू जळून खाक झाल्या. तेवढ्यात नेहरू चौकाजवळील रस्त्यावरून तिघेजण दुचाकीवरून चालले होते. त्याचवेळी हा स्फोट होऊन खिडकी खाली पडून आबासाहेब हिप्परकर यांच्या हाताला गंभीर मार लागला होता.
या घटनेची माहिती मिळताच, लोणी काळभोर पोलीस ठाण्याचे पोलीस निरीक्षक (गुन्हे) स्मिता पाटील, सहाय्यक पोलीस निरीक्षक अंकुश बोराटे, पोलीस उपनिरीक्षक पूजा माळी, सहाय्यक फौजदार रामदास मेमाणे, पोलीस हवालदार मंगेश नानापुरे, मल्हारी ढमढेरे तसेच लोणी काळभोरचे सरपंच नागेश काळभोर हे तत्काळ घटनास्थळी दाखल झाले. पोलिसांनी स्थानिक नागरिकांच्या मदतीने आग विझवली.
दरम्यान, करूणा जगताप या स्फोटात गंभीर जखमी झाल्या होत्या. त्यांना तत्काळ महाराजा रुग्णवाहिकेच्या माध्यमातून लोणी काळभोर येथील एका बड्या रुग्णालयात उपचारासाठी दाखल करण्यात आले. परंतु, त्यांच्या प्रकृतीत सुधारणा होत नसल्याने त्यांना पूढील उपचारासाठी पुण्यातील सूर्या हॉस्पिटल मध्ये दाखल करण्यात आले. करूणा जगताप यांच्यावर हॉस्पिटल मध्ये उपचार सुरू असताना आज अखेर त्यांची प्राणज्योत मालवली. करूणा जगताप यांच्या मृत्यूमुळे लोणी काळभोरसह परिसरात शोकाकला पसरली आहे.
स्फोटाचे कारण अद्यापही अस्पष्ट
लोणी काळभोर पोलिसांनी घटनास्थळी फॉरेन्सिक टीम बोलावली होती. फॉरेन्सिक टीमने घटनास्थळाचे पुरावे गोळा केले असून ते प्रयोगशाळेत तपासण्यासाठी घेऊन गेले आहेत. स्फोट सिलेंडरमधून गॅस गळती, गिझर स्फोट, फटाके वाजल्याने की अन्य कोणत्या कारणाने हा स्फोट झाला आहे. याचे खरे कारण अद्याप समोर आलेले नाही. फॉरेन्सिक टीमच्या अहवालातून स्फोटाचे खरे कारण पुढे येईल. लोणी काळभोर पोलीस ठाण्यात या घटनेची नोंद करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस हवालदार केतन धेंडे करत आहेत.
