पुणे: आर्थिक वर्ष २०२६-२७ साठी ITR भरण्याच्या नियमावलीत सरकारने महत्त्वपूर्ण बदल केले आहेत. पगारवाढीचा आणि प्रमोशनचा काळ सुरू असताना, नवीन लेबर कोडच्या प्रभावामुळे तुमच्या सॅलरी स्ट्रक्चरमध्ये बदल झाले आहेत. या बदलांचा थेट परिणाम तुमच्या टॅक्स फाईलिंगवर होणार आहे, त्यामुळे करदात्यांनी नवीन डेडलाईन्सची माहिती घेणे अत्यंत आवश्यक आहे.
प्राप्तिकर विभागाने आता करदात्यांच्या वर्गवारीनुसार रिटर्न भरण्याच्या तारखा निश्चित केल्या आहेत. वेतनभोगी कर्मचारी आणि पेन्शनधारकांसाठी, ज्यांना ITR-1 किंवा ITR-2 फॉर्म लागू होतो, त्यांच्यासाठी ३१ जुलै २०२६ ही अंतिम तारीख कायम ठेवण्यात आली आहे. याउलट, छोटे व्यापारी, फ्रीलान्सर्स आणि व्यावसायिक, जे ITR-3 किंवा ITR-4 अंतर्गत येतात, त्यांना ३१ ऑगस्ट २०२६ पर्यंत मुदतवाढ देण्यात आली आहे. ज्या संस्थांना टॅक्स ऑडिटची आवश्यकता आहे, त्यांनी ३१ ऑक्टोबर २०२६ पर्यंत रिटर्न भरणे आवश्यक आहे, परंतु त्यांचा ऑडिट रिपोर्ट ३० सप्टेंबर २०२६ पर्यंत जमा करणे बंधनकारक आहे.
एक अत्यंत सकारात्मक बदल म्हणजे ‘रिव्हाइझ्ड रिटर्न’ भरण्याची मुदत आता ३१ मार्च २०२७ पर्यंत वाढवण्यात आली आहे. जर टॅक्स फाईल करताना एखादी चूक झाली असेल किंवा कलम ८०सी (80C) अंतर्गत कर सवलत मिळवायची राहून गेली असेल, तर आता ती सुधारण्यासाठी करदात्यांकडे भरपूर वेळ असणार आहे.
