पुणे : दुष्काळामुळे आधीच शेतीचे गणित कोलमडले असताना, कर्जमाफीच्या प्रक्रियेत बँक अधिकाऱ्यांच्या चुकीच्या कारभारामुळे 68 शेतकऱ्यांवर मोठे संकट ओढवले आहे. इंडियन ओव्हरसीज बँकेच्या अनास्थेमुळे हा प्रकार समोर आला आहे.
लोहगाव, शिरसी खुर्द आणि शिरसी बुद्रुक या गावांमधील शेतकऱ्यांनी जेवढे पीककर्ज प्रत्यक्षात घेतले होते, त्यापेक्षा तब्बल चार ते पाच पट अधिक रक्कम कर्जमाफीच्या पोर्टलवर अपलोड करण्यात आली आहे. या मोठ्या तफावतीमुळे या सर्व शेतकऱ्यांना कर्जमाफीचा लाभ मिळण्यात अडचणी निर्माण झाल्या आहेत. बँकेच्या संबंधित अधिकाऱ्यांनी चूक मान्य करून ती सुधारण्याचे आश्वासन दिले असले, तरी प्रत्यक्षात मागील दीड महिन्यापासून शेतकरी बँकेच्या चकरा मारत आहेत. मात्र, अद्याप कोणतीही दुरुस्ती झालेली नाही.
आधीच पावसाअभावी हातातोंडाशी आलेला घास हिवाळाच्या तोंडावर हिरावला गेला आहे. आर्थिक परिस्थिती आधीच बिकट असताना आता कागदपत्रांमधील आणिपोर्टलवरील या त्रुटींमुळे शेतकरी हवालदिल झाले आहेत. बँकेनं लवकरात लवकर योग्य ती सुधारणा करून पोर्टलवर खरी आकडेवारी अपलोड करावी, अशी मागणी जोर धरत आहे.
जर येत्या ३ दिवसांत हा प्रश्न मार्गी लागला नाही, तर शिंदे सेनेच्या वतीने तीव्र आंदोलन करत संबंधित बँकेला कुलूप ठोकण्याचा इशारा देण्यात आला आहे. शेतकऱ्यांच्या या रोषाची दखल घेऊन बँक प्रशासन आता काय पावले उचलणार, याकडे सर्वांचे लक्ष लागले आहे.
