पुणे: जुलै महिन्याच्या पहिल्याच दिवशी हॉटेल आणि खानावळ चालकांसाठी एक दिलासादायक बातमी समोर आली आहे. केंद्र सरकारने व्यावसायिक वापराच्या १९ किलोच्या गॅस सिलिंडरच्या किमतीत १८३.५० रुपयांची कपात करण्याचा निर्णय घेतला आहे. या नवीन दर कपातीमुळे व्यावसायिक सिलिंडर आता २,९३० रुपयांना उपलब्ध होणार आहे, जो पूर्वी ३,११३.५० रुपयांना मिळत होता. मात्र, घरगुती वापराच्या १४.२ किलो सिलिंडरच्या किमतीत कोणताही बदल न झाल्याने सर्वसामान्यांना अजूनही दिलासा मिळालेला नाही.
चालू वर्षाच्या सुरुवातीपासूनच गॅसच्या किमतींमध्ये मोठ्या प्रमाणावर चढ-उतार पाहायला मिळत होते. जानेवारी २०२६ मध्ये दिल्लीमध्ये १,६९१.५० रुपयांना मिळणारा हा सिलिंडर जूनपर्यंत पोहोचताना जवळजवळ दुप्पट झाला होता. या पार्श्वभूमीवर आजची १८३.५० रुपयांची कपात व्यावसायिकांसाठी नक्कीच दिलासादायक आहे.
दुसरीकडे, केंद्र सरकारने इंधन क्षेत्राशी संबंधित एक धोरणात्मक पाऊल उचलले आहे. पेट्रोलच्या निर्यातीवर आकारले जाणारे विशेष अतिरिक्त उत्पादन शुल्क १.५ रुपयांवरून वाढवून ४ रुपये प्रति लिटर करण्यात आले आहे.
