धाराशिव : राष्ट्रवादी काँग्रेस शरदचंद्र पवार पक्षाचे आमदार अभिजीत पाटील यांच्या साखर कारखान्यामध्ये तब्बल १ कोटी १० लाखांची सायबर ऑनलाईन फसवणूक झाल्याचा धक्कादायक प्रकार उघडकीस आला आहे.ज्यामुळे सहकार क्षेत्रात खळबळ उडाली आहे.
याबाबत अधिक माहिती अशी की, राष्ट्रवादीचे नेते अभिजीत पाटील हे माढा विधानसभा मतदारसंघाचे विद्यमान आमदार असून त्यांचे पाच साखर कारखाने आहेत. त्यांच्या चोराखळी येथील धाराशिव साखर कारखान्यात अधिकारी असलेल्या बाबासाहेब वाडेकर यांच्याशी एका सायबर भामट्याने संपर्क केला होता. १५ ते १७ एप्रिल या कालावधीत आपण कारखान्याचे चेअरमन अमर पाटील बोलत असल्याचं भासवून त्याने संवाद केला. यानंतर इमर्जन्सी असल्याचे सांगत एका बँक खात्यात १ कोटी १० लाख रुपये ट्रान्स्फर करण्यास सांगितले. तीन दिवसांतील संवादानंतर विश्वास वाटल्याने वाडेकर यांनी ही रक्कम वर्ग केली. या कारखान्याचे एमडी असलेले अभिजीत पाटील यांचे बंधू अमर पाटील असल्याचे भासवत त्यांची ही फसवणूक झाली. फसवणूक करणाऱ्यांनी अमर पाटील यांचा फोटो डीपीला ठेवला होता त्यामुळे बाबासाहेब वाडेकर फसले गेले.
या फसवणूकीप्रकरणी धाराशिव सायबर पोलिसात फसवणुकीचा गुन्हा दाखल करण्यात आला असून आरोपीच्या शोधात सायबर पोलिसांकडून पथक तैनात तयार करण्यात आले आहे.दरम्यान पोलिसांनी गुन्हा नोंदवून तातडीने तपास सुरू केल्याने आतापर्यंत सहा आरोपी हाती लागले आहेत.
