पुणे : सासरच्या जाचाला कंटाळून एका विवाहितेने स्वतःचे आयुष्य संपवल्याची धक्कादायक घटना पिंपरी-चिंचवडमधील वाकड परिसरात उघडकीस आली आहे. शिल्पा गवारे असे या दुर्दैवी महिलेचे नाव असून, त्या प्रसिद्ध व्यावसायिक संतोष कलाटे यांच्या भगिनी आणि भाजप नगरसेविका स्नेहा कलाटे यांच्या नणंद होत्या. रक्षाबंधन सणाच्या दिवशी या दुर्दैवी घटनेची माहिती मिळताच राज्याचे मुख्यमंत्री देवेंद्र फडणवीस यांनी पीडित कुटुंबाशी फोनवरून थेट संवाद साधला.
मुख्यमंत्री देवेंद्र फडणवीस यांनी हे प्रकरण अतिशय गंभीर असून, शिल्पा गवारे आत्महत्या खटला फास्ट ट्रॅक न्यायालयात चालवला जाईल आणि पीडित कुटुंबाला पूर्ण न्याय मिळवून दिला जाईल, असा शब्द शिल्पा गवारे यांच्या कुटुंबियाना दिला.मिळालेल्या माहितीनुसार, शिल्पा गवारे यांचा सासरच्या मंडळींकडून सतत मानसिक आणि शारीरिक छळ सुरू होता. माहेरहून पैसे आणण्यासाठी तसेच संपत्तीच्या कारणावरून त्यांच्यावर वारंवार दबाव आणला जात होता.
या सततच्या त्रासाला आणि त्रासाच्या पराकाष्ठेला कंटाळून त्यांनी अखेर आपले जीवन संपवण्याचा टोकाचा निर्णय घेतला. याप्रकरणी पोलिसांनी सासरच्या नातेवाईकांवर गुन्हा दाखल केला आहे. वाकड परिसरात मागील दीड वर्षाच्या कालावधीत घडलेली ही दुसरी अत्यंत दुर्दैवी घटना आहे.
दरम्यान मे 2025 मध्ये गाजलेल्या वैष्णवी हगवणे प्रकरणाच्या तीव्र वेदना ताज्या असतानाच आता शिल्पा गवारे यांच्या मृत्यूने संपूर्ण परिसरात तीव्र संताप व हळहळ व्यक्त केली जात आहे. अशा घटनांमुळे कौटुंबिक छळाच्या बळींचा प्रश्न पुन्हा एकदा ऐरणीवर आला आहे.
