पुणे : पुणे विमानतळावर कस्टम विभागाने मोठी कारवाई करत बँकॉकहून आलेल्या एका प्रवाशाला अटक केली आहे. त्याच्या बॅगेत लपवून आणलेला तब्बल 1 किलो 265 ग्रॅम उच्च दर्जाचा हायड्रोपोनिक वीड (गांजा) जप्त करण्यात आला असून, आंतरराष्ट्रीय बाजारात या अंमली पदार्थाची किंमत सुमारे 44 लाख 27 हजार रुपये आहे.
एअर इंडिया एक्सप्रेसच्या फ्लाईट ‘IX-241’ ने हा प्रवासी बँकॉकहून पुणे विमानतळावर उतरला होता. विमानतळावर आगमन झाल्यानंतर सर्व काही सामान्य वाटत होते. परंतु, अधिकाऱ्यांनी जेव्हा या भारतीय प्रवाशाच्या कागदपत्रांची आणि त्याच्या बॅगेची कसून तपासणी केली, तेव्हा त्यांना संशय आला. त्यांनी तातडीने प्रवाशाला रोखून त्याच्या काळ्या रंगाच्या ट्रॉली बॅगेची सखोल तपासणी केली.
तपासणीदरम्यान अधिकाऱ्यांना जे आढळले त्याने तेही थक्क झाले. प्रवाशाने आपल्या वैयक्तिक कपड्यांच्या खाली बॅगेच्या दोन्ही बाजूंच्या अस्तर मध्ये दोन गुप्त कप्पे तयार केले होते. या विशेष कप्प्यांमध्ये हवाबंद पाकिटांमध्ये हा गांजा अत्यंत चलाखीने लपवून ठेवण्यात आला होता. प्राथमिक चाचणी केली असता हा प्रतिबंधित हायड्रोपोनिक वीड असल्याचे स्पष्ट झाले.
सीमाशुल्क विभागाने एनडीपीएस (NDPS) कायद्याच्या कठोर कलमांनुसार हा 1 किलो 265 ग्रॅम वजनाचा सर्व अंमली पदार्थांचा साठा जप्त केला आहे. याप्रकरणी संबंधित प्रवाशाला तात्काळ बेड्या ठोकण्यात आल्या असून, न्यायालयात हजर केल्यानंतर त्याला न्यायालयीन कोठडी सुनावण्यात आली आहे.
सध्या या तस्करीमागील खरा मास्टरमाइंड कोण आहे आणि या रॅकेटमध्ये आणखी कोणाकोणाचा सहभाग आहे, याचा कसून शोध कस्टम विभाग घेत आहे. बँकॉक ते पुणे या प्रवासात अंमली पदार्थांची तस्करी करण्याची ही नवी पद्धत समोर आल्याने सुरक्षा यंत्रणा अधिक सतर्क झाल्या आहेत.
