नवी दिल्ली: सध्या Apple iPhone चा वापर वाढताना दिसत आहे. तुम्ही जर आयफोन यूजर असाल आणि ॲप्स डाउनलोड करण्यासाठी ॲप स्टोअर वापरत असाल तर तुमच्यासाठी एक महत्त्वाची बातमी असणार आहे. Apple ने App Store वरून नुकतेच सुमारे 1.35 लाख ॲप्स त्यांच्या प्लॅटफॉर्मवरून काढून टाकले आहेत. ॲप स्टोअरमध्ये पारदर्शकता वाढवण्याच्या उद्देशाने हे पाऊल उचलण्यात आले आहे.
Apple ने ॲप डेव्हलपर्सना त्यांच्या ट्रेडरची माहिती अपडेट करण्यासाठी 17 फेब्रुवारीपर्यंत वेळ दिला होता. त्यामध्ये हजारो ॲप्स या नियमाचे पालन करू शकले नाहीत, ज्यामुळे ॲपलने युरोपियन युनियन (EU) नियमांनुसार हे ॲप्स काढून टाकले. युरोपियन युनियनच्या नवीन डिजिटल सेवा कायद्यानुसार (DSA) ॲप डेव्हलपर्सना त्यांच्या व्यवसायाची माहिती सार्वजनिक करावी लागणार आहे. म्हणजेच एखाद्या डेव्हलपर्सला ॲप स्टोअरवर त्याचे ॲप ठेवायचे असेल तर त्याला त्याचा पत्ता, ई-मेल आयडी आणि फोन नंबर यांसारखी आवश्यक माहिती द्यावी लागेल. जे डेव्हलपर्स ही माहिती देत नाहीत त्यांचे ॲप्स काढून टाकले जातील.
दरम्यान, DSA तात्पुरते 2023 मध्ये लागू करण्यात आले होते. मात्र, परंतु 17 फेब्रुवारी 2025 पासून ते पूर्णपणे लागू झाले आहे. त्यामुळे ॲप डेव्हलपर्सना त्यांची माहिती अपडेट करण्यासाठी फेब्रुवारीपर्यंत वेळ देण्यात आला होता. पण, अनेक डेव्हलपर्सने याचं पालन केलं नाही. परिणामी, अॅप्स हटवण्यात आली आहेत.
