सागर जगदाळे
इंदापूर : तालुक्यातील म्हसोबाचीवाडी येथील 30 वर्षीय विवाहित महिला बारामती येथे कामाला जात असल्याचे सांगून घरातून निघून गेल्यानंतर परत न आल्याने भिगवण पोलीस ठाण्यात अज्ञात व्यक्तीविरुद्ध अपहरणाचा गुन्हा दाखल करण्यात आला आहे.
भिगवण पोलीस ठाण्यात दाखल माहिती अहवालानुसार, सारिका ज्योतीराम वाघ (वय 30, रा. म्हसोबाचीवाडी, ता. इंदापूर, जि. पुणे) या 26 सप्टेंबर 2026 रोजी पहाटे पाच वाजण्याच्या सुमारास बारामती येथे कामाला जात असल्याचे सांगून घरातून निघून गेल्या. मात्र, त्या घरी परत न आल्याने त्यांच्या पतीने पोलिसांत तक्रार दाखल केली.तक्रारीमध्ये अज्ञात व्यक्तीने अज्ञात कारणासाठी संबंधित महिलेचे अपहरण केले असावे, अशी शक्यता व्यक्त करण्यात आली आहे. त्यानुसार भिगवण पोलीस ठाण्यात गुन्हा दाखल करण्यात आला आहे.
बेपत्ता महिलेचा रंग सावळा असून चेहरा उभट, नाक सरळ, केस काळे व मध्यम आहेत. त्यांची उंची अंदाजे पाच फूट असून, घरातून निघताना त्यांनी पांढऱ्या रंगाचा ड्रेस व काळ्या रंगाच्या लेगिज परिधान केल्या होत्या. त्यांना मराठी भाषा अवगत आहे.
या प्रकरणाचा तपास भिगवण पोलीस ठाण्याचे तपासी अधिकारी सचिन भस्मे करीत आहेत.
सदर महिलेबाबत कोणाला काही माहिती मिळाल्यास तपासी अधिकारी सचिन भस्मे यांच्याशी मो.9881387487/9552164100 या क्रमांकांवर संपर्क साधावा, असे आवाहन करण्यात आले आहे
