बीड : बीड जिल्ह्यात आधीच पावसाने पाठ फिरवल्याने शेतकरी पाणीटंचाईचा सामना करत आहेत. उपलब्ध पाण्याची जुळवाजुळव करून आणि पदरमोड करून शेतकरी आपली पिके जगवण्याचा प्रयत्न करत आहेत. अशातच उसाच्या शेतांना आग लागल्याने ११ शेतकऱ्यांचे मोठे नुकसान झाले आहे. या आगीत तब्बल १४ एकरांवरील ऊस जळून खाक झाल्याची माहिती समोर आली आहे. वर्षभर मेहनत करून उभे केलेले पीक डोळ्यांदेखत जळताना पाहण्याची वेळ शेतकऱ्यांवर आली आहे.
या आगीत रामराव राठोड यांचा दोन एकर, श्रीराम राठोड यांचा दोन एकर, नागेश चव्हाण यांचा एक एकर, सुंदर चव्हाण यांचा एक एकर आणि गोवर्धन चव्हाण यांचा एक एकर ऊस जळाला आहे. याशिवाय नवनाथ आढे, वसंता चव्हाण, विजय प्रकाश चव्हाण, बाळू बंडू चव्हाण आणि भीमराव यांचा प्रत्येकी एक एकर ऊस आगीत जळून खाक झाला. तसेच बिराजदार यांचा दोन एकर ऊस जळाल्याची माहिती आहे. अशा प्रकारे ११ शेतकऱ्यांचे मिळून १४ एकर उसाचे नुकसान झाले आहे.
ऊस लागवडीपासून ते काढणीपर्यंत शेतकऱ्यांना मोठा खर्च करावा लागतो. खतं, औषधं, मजुरी आणि सिंचनासाठी पैसे खर्च करावे लागतात. अनेक शेतकरी कर्ज काढून पीक उभे करतात. ऊस वाढल्यानंतर त्यातून चांगले उत्पन्न मिळेल आणि आर्थिक परिस्थिती सुधारेल, अशी त्यांना आशा असते. मात्र, आगीमुळे हातातोंडाशी आलेले पीक नष्ट झाल्याने त्यांच्या वर्षभराच्या मेहनतीवर पाणी फेरले गेले आहे.
एकीकडे पाणीटंचाई आणि दुष्काळाचे सावट, तर दुसरीकडे आगीमुळे झालेलं नुकसान, अशा दुहेरी संकटात शेतकरी सापडले आहेत. शेतीतून मिळणाऱ्या उत्पन्नावर घरखर्च, मुलांचे शिक्षण आणि कर्जाची परतफेड अवलंबून असते. त्यामुळे या नुकसानीमुळे शेतकऱ्यांसमोरील आर्थिक अडचणी आणखी वाढण्याची शक्यता आहे.
या घटनेनंतर नुकसानग्रस्त शेतकऱ्यांना मदत मिळण्याची अपेक्षा व्यक्त केली जात आहे. संबंधित यंत्रणांनी जळालेल्या उसाची पाहणी करून नुकसानीचा आढावा घ्यावा आणि शेतकऱ्यांना आर्थिक मदत मिळवून द्यावी, अशी मागणी होण्याची शक्यता आहे. दुष्काळाशी झुंज देणाऱ्या शेतकऱ्यांना या संकटातून सावरण्यासाठी मदतीची गरज आहे.
