पुणे, ता.२५ : उत्तम आरोग्यासाठी व्यायाम महत्त्वाचा आहे. आजच्या धकाधकीच्या, ताणतणावाच्या आयुष्यात जीवनशैली, आहाराच्या पद्धती बदलल्यामुळे अनेकांना आजार कमी वयातच ग्रासत असल्याचे दिसत आहे. त्यामुळे आरोग्य चांगले राहण्यासाठी व्यायाम अत्यंत आवश्यक आहे. अलीकडे हृदयविकाराचे प्रमाण वाढलेले दिसत आहे. यावर जलदगतीने चालण्याचा व्यायाम उपयुक्त ठरत असल्याचे एका संशोधनातून समोर आले आहे.
अभ्यासकांनी एक संशोधन केले. यामध्ये विशेषतः ज्येष्ठ महिलांमध्ये हृदयविकाराचा धोका 34 टक्क्यांनी कमी झाल्याचा निष्कर्ष या समोर आला आहे. नुकत्याच केलेल्या एका संशोधनात जलद चालण्याच्या व्यायामामुळे महिलांना वृद्धापकाळातही हृदयविकाराचा झटका येण्याचा धोका कमी होऊ शकत असल्याचा दावा करण्यात आला आहे.
संशोधकांनी 25 हजारांहून अधिक ज्येष्ठ महिलांवर जवळपास 20 वर्षे संशोधन केले. या संशोधनात सहभागी महिलांना त्या दररोज किती चालतात, याबाबत माहिती विचारण्यात आली. त्यांच्या उत्तरांच्या आधारे अहवाल तयार करण्यात आला. यात असे आढळून आले की ज्या महिला वेगाने चालतात त्यांना हृदयविकाराचा धोका 34 टक्के कमी असतो.
काही महिला संथ गतीनं चालतात. कारण त्यांचे स्नायू कमजोर झालेले असू शकतात. मात्र, संथ गतीने चालणाऱ्यांपेक्षा वेगवान चालणाऱ्यांना अधिक फायदे मिळतात, असे अभ्यासात स्पष्ट झाले आहे. या काळात 1455 महिलांचे हार्ट फेल झाले. अर्थात, त्यांच्या हृदयाची शरीराला रक्तपुरवठा करण्याची क्षमता संपली, असे या संशोधनात आढळून आले. त्यामुळे जलदगतीने चालण्याचा सल्ला आरोग्यतज्ज्ञांकडून दिला जातो.
