मुंबई : अभिनेता टायगर श्रॉफवरील गोळीबाराच्या घटनेची चर्चा सुरू असतानाच आता मुंबईत आणखी एका धमकीच्या प्रकरणाची माहिती समोर आली आहे. बॉलिवूडचे ज्येष्ठ अभिनेते अमिताभ बच्चन यांच्या ‘जलसा’ बंगल्यासह महापौर कार्यालय, काही शाळा आणि इतर ठिकाणांना बॉम्बने उडवण्याची धमकी देण्यात आल्याचे वृत्त आहे. या प्रकरणामुळे मुंबईतील सुरक्षा व्यवस्थेबाबत चिंता व्यक्त केली जात आहे.
मिळालेल्या माहितीनुसार, मुंबईच्या महापौर रितू तावडे यांच्या अधिकृत ईमेलवर धमकीचा संदेश पाठवण्यात आला. या मेलमध्ये 31 ऑक्टोबर ते 27 नोव्हेंबर या कालावधीत अमिताभ बच्चन यांचा ‘जलसा’ बंगला उडवून देण्याची धमकी दिल्याचे सांगितले जात आहे. मात्र, या धमकीमागे नेमके कोण आहे, हे अद्याप स्पष्ट झालेले नाही.
या संदेशात पंजाबी गायक दिलजीत दोसांझ याचाही उल्लेख असल्याची माहिती आहे. 27 नोव्हेंबर रोजी होणाऱ्या त्याच्या कॉन्सर्टदरम्यान हल्ला करण्याचा इशारा देण्यात आल्याचे वृत्त आहे. याशिवाय महालक्ष्मी रेसकोर्स, महापौर कार्यालय आणि 3 ते 4 शाळांना लक्ष्य करण्याची धमकीही मेलमध्ये दिल्याचे सांगितले जात आहे. 31 ऑक्टोबर रोजी शाळांवर हल्ला होण्याचा उल्लेख असल्याची माहिती समोर आली आहे.
धमकी मिळाल्यानंतर संबंधित ठिकाणी सुरक्षेच्या दृष्टीने तपासणी करण्यात आली. बॉम्बशोधक पथकाने महापौर कार्यालयाची पाहणी केली, तर पोलिसांनी शाळांमध्येही तपासणी केली. उपलब्ध माहितीनुसार, या तपासणीत कोणतीही संशयास्पद वस्तू आढळली नाही. दरम्यान, धमकीचा ईमेल कोणी पाठवला, याचा शोध पोलीस घेत आहेत.
या मेलमध्ये खलिस्तान आणि काही संघटनांचा उल्लेख असल्याचेही वृत्त आहे. तसेच 1984 मधील ऑपरेशन ब्लू स्टारचा बदला घेण्यासाठी हल्ला करण्याचा दावा संदेश पाठवणाऱ्याने केल्याचे सांगितले जात आहे. या दाव्याची स्वतंत्र पुष्टी झालेली नाही. त्यामुळे तपासातूनच या धमकीमागील सत्य स्पष्ट होणार आहे.
