नवी मुंबई: प्रेमासाठी माणूस कोणत्याही थराला जाऊ शकतो, असं म्हटलं जातं. मात्र, प्रेमसंबंधातून निर्माण झालेला संशय आणि नकार एखाद्याच्या जीवावर बेतू शकतो, याची धक्कादायक घटना नवी मुंबईतील नेरूळ रेल्वे स्टेशनबाहेर घडली आहे. येथे एका २१ वर्षीय तरुणीवर तिच्याच प्रियकराने चाकूने हल्ला केला. या हल्ल्यात गंभीर जखमी झालेल्या तरुणीचा उपचारादरम्यान मृत्यू झाला. या घटनेमुळे परिसरात खळबळ उडाली आहे.
सादिया जाकीर शेख असे मृत तरुणीचे नाव असून, दानिश मोहम्मद अन्सारी असे आरोपीचे नाव आहे. मिळालेल्या माहितीनुसार, दोघेही वडाळा परिसरातील रहिवासी होते आणि गेल्या चार वर्षांपासून त्यांच्यात प्रेमसंबंध होते. या नात्यासाठी दानिशने धर्मांतर केल्याची माहितीही समोर आली आहे. मात्र, काही काळानंतर त्यांच्या नात्यात संशय आणि वाद निर्माण होऊ लागले.
गेल्या वर्षभरापासून दोघांमध्ये संशयावरून वारंवार वाद होत असल्याचे सांगितले जाते. सादियाचे अन्य व्यक्तीसोबत संबंध असल्याचा संशय दानिशला होता. याच कारणावरून त्यांच्यात तणाव वाढला होता. दानिशने सादियाकडे लग्नाची मागणी केली होती. मात्र, सादियाने लग्नास स्पष्ट नकार दिला होता. ती आपल्याला टाळत असल्याची भावना दानिशच्या मनात निर्माण झाली होती, अशी माहिती समोर आली आहे.
लग्नास नकार दिल्याच्या रागातून दानिशने नेरूळ रेल्वे स्टेशनबाहेर सादियावर चाकूने वार केल्याचा आरोप आहे. या हल्ल्यात ती गंभीर जखमी झाली. तिला तातडीने उपचारासाठी रुग्णालयात दाखल करण्यात आले; मात्र डॉक्टरांच्या प्रयत्नांनंतरही तिचा जीव वाचू शकला नाही.
या प्रकरणी नेरूळ पोलिसांनी तपास सुरू केला. आरोपी दानिश मोहम्मद अन्सारी याला घणसोली येथून अटक करण्यात आली आहे. त्याला २८ तारखेपर्यंत पोलीस कोठडी सुनावण्यात आल्याची माहिती आहे. या घटनेमागील नेमकी परिस्थिती, हल्ल्याचे कारण आणि संबंधित बाबींचा पुढील तपास पोलीस करत आहेत.
