मुंबई: बॉलिवूडमधील प्रसिद्ध मराठी अभिनेता श्रेयस तळपदे याला गुरुवारी संध्याकाळी मुंबईत हृदयविकाराचा झटका आला. ४७ वर्षीय श्रेयसने संपूर्ण दिवस शुटींग केली आणि त्यानंतर तो हृदयविकाराच्या झटक्याने खाली कोसळला. त्याला तातडीने रुग्णालयात दाखल करण्यात आले आहे. अंधेरी पश्चिम येथील शहरातील बेलेव्ह्यू रुग्णालयात त्याची अँजिओप्लास्टी करण्यात आली.
एका इंग्रजी वेबसाईटने दिलेल्या वृत्तानुसार, श्रेयस तळपदे पूर्णपणे बरा होता आणि त्याने अंडरप्रॉडक्शन मल्टीस्टारर चित्रपट ‘वेलकम टू द जंगल’साठी संपूर्ण दिवसभर शूट केले. “त्याने दिवसभर चित्रीकरण केले, तो पूर्णपणे ठीक होता आणि सेटवर सर्वांशी हसून बोलत होता. त्याने थोडेसे अॅक्शन सीक्वेन्सही शूट केले. शूट संपल्यानंतर तो घरी परतला आणि त्याने पत्नीला सांगितले की, त्याला अस्वस्थ वाटत आहे. तिने त्याला लगेच हॉस्पिटलमध्ये नेले, पण तो वाटेतच कोसळला.”
श्रेयस तळपदे रुग्णालयात दाखल आहेत. त्याला संध्याकाळी उशिरा आणण्यात आले. त्याच्या प्रकृतीच्या अपडेटची प्रतीक्षा आहे. काही सूत्रांच्या माहितीनुसार त्याच्यावर अँजिओप्लास्टी करण्यात आली असून त्याची प्रकृती आता बरी आहे.
