योगेश पडवळ
Shirur News : पाबळ, (शिरूर) : सरपण आणण्यासाठी गेलेल्या दोन अल्पवयीन बहिणींचा एका ३० वर्षीय युवकाने विनयभंग केल्याची घटना घडली आहे. (तामकरवाडी, टाकळी हाजी, ता. शिरूर) ग्रामपंचायत हद्दीत हि घटना घडली आहे. याप्रकरणी युवकावर विनयभंग व बाल लैंगिक अत्याचारप्रकरणी गुन्हा दाखल करण्यात आला आहे.
गुन्हा दाखल
गणेश मारुती गावडे (वय ३०, रा. तामकरवाडी, टाकळी हाजी) असे गुन्हा दाखल करण्यात आलेल्या तरुणाचे नाव आहे.
पोलिसांनी दिलेल्या माहितीनुसार, दोन अल्पवयीन बहिणी या सरपण आणण्यासाठी टाकळी हाजी ग्रामपंचायत हद्दीत एका शेतात निघाल्या होत्या. यावेळी गणेश गावडे या तरूणाने अल्पवयीन युवतींचा पाठलाग केला. त्याने मुलींना पकडून मुलींच्या मनास लज्जा निर्माण होईल असे वर्तन केले. यावेळी मुलींनी आरडओरडा करत याला ढकलून देऊन घराकडे पळून गेल्या.
दरम्यान, आरोपी तरुणाने या बहिणींना, ‘जर तुम्ही घरी सांगितले तर मारून टाकीन अशी धमकी दिली. त्यामुळे त्या मुलींनी सर्व प्रकार आईला सांगितला. मुलींच्या आईने याबाबत, त्याच्याविरोधात शिरूर पोलीस स्टेशन ला फिर्याद दिली. पोलिसांनी तरूणाविरुद्ध गुन्हा दाखल केला आहे. पुढील तपास पोलीस उपनिरीक्षक स्नेहल चरापले करीत आहेत.
