शेरखान शेख
Ranjangaon News : रांजणगाव गणपती : रांजणगाव गणपती (ता. शिरुर) येथील औद्योगिक वसाहतीमध्ये ‘आम्ही माथाडी-हमाल पंचायतीचे कामगार आहोत,’ असे सांगत वाहनचालकाला मारण्याची धमकी देऊन त्याच्याकडून खंडणी वसूल केल्याची घटना घडली. याप्रकरणी रांजणगाव एमआयडीसी पोलीस स्टेशन येथे पांडुरंग बबन अभंग, लक्ष्मण गोरडे व महादेव मलगुंडे यांच्याविरुद्ध गुन्हे दाखल करण्यात आले आहेत.
रांजणगाव एमआयडीसी पोलीस स्टेशन येथे गुन्हा दाखल
रांजणगाव गणपती (ता. शिरुर) येथील औद्योगिक वसाहतीमध्ये विठ्ठल कचरे हे त्यांच्या ताब्यातील वाहनातून कंपनीचे साहित्य घेऊन करारो इंडिया या कंपनीमध्ये आले होते. कंपनीच्या बाहेर त्यांनी वाहन उभे केले असता, पांडुरंग अभंग, लक्ष्मण गोरडे व महादेव मलगुंडे हे तिघे त्याठिकाणी आले. त्यांनी कचरे यांना दमदाटी करत, ‘आम्ही माथाडी हमाल पंचायतीचे कामगार आहोत. आमच्याकडून पावती घे, आम्हाला आठशे रुपये दे, नाहीतर तुला गाडी खाली करु देणार नाही. गाडी येथे लावू नको,’ असे म्हणून कचरे यांची कॉलर पकडून त्यांना मारण्याची धमकी दिली.
कचरे याच्याकडून फोन पे वरून आठशे रुपयांची खंडणी वसूल करुन, ‘कोणाला काही सांगितले तर तुला जिवंत सोडणार नाही’ अशी धमकी दिली. (Ranjangaon News) याबाबत विठ्ठल बबन कचरे (वय ३६ वर्षे, रा. पाडळी लोणंद, ता. खंडाळा, जि. सातारा) यांनी रांजणगाव एमआयडीसी पोलीस स्टेशन येथे फिर्याद दिली. पोलिसांनी पांडुरंग बबन अभंग, लक्ष्मण गोरडे व महादेव मलगुंडे यांच्याविरुद्ध दमदाटीसह खंडणी प्रकरणी गुन्हे दाखल केले आहेत.
या घटनेचा पुढील तपास पोलीस निरीक्षक महेश ढवाण यांच्या मार्गदर्शनाखाली सहाय्यक पोलीस निरीक्षक अनिल मोरडे हे करत आहेत.
अधिक बातम्या वाचण्यासाठी येथे क्लिक करा :
Ranjangaon News : खंडाळे माथा येथे हॉटेलवर दगडफेक करत मागितली खंडणी; एकावर गुन्हा दाखल
Ranjangaon News : “पी एम स्किल रन”ला टाकळी हाजी मध्ये उस्फूर्त प्रतिसाद.
