loni kalbhor : किरकोळ वादातून एका मजूरावर दगडाने हल्ला करून मारहाण केल्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील घोरपडे वस्ती परिसरात 23 मार्च 2026 रोजी सकाळी साडेदहाच्या सुमारास घडली आहे. या प्रकरणी तीन महिलांविरुद्ध गुन्हा दाखल करण्यात आला आहे.
आरी काळे, पूजा काळे व दीदी काळे अशी गुन्हा दाखल करण्यात आलेल्या तीन महिलांची नावे आहेत. याप्रकरणी अर्जुन काकासाहेब शिंदे (वय 36, रा. बाजार मंडई, लोणी काळभोर) यांनी लोणी काळभोर पोलिस ठाण्यात तक्रार दिली आहे.
पोलिसांनी दिलेल्या माहितीनुसार, अर्जुन शिंदे हे मजुरी करून कुटुंबाचा उदरनिर्वाह करतात व आपल्या भाऊ-भावजयांसह राहतात. अर्जुन शिंदे हे घोरपडे वस्ती येथे नातेवाईकांकडे कामानिमित्त गेले होते. त्यावेळी परिसरात संशयास्पदरीत्या दोन युवक थांबलेले दिसल्याने त्यांनी तेथे उपस्थित महिलांना सावधगिरीचा इशारा दिला. मात्र यावरून वाद निर्माण झाला.
वाद चिघळल्याने संबंधित महिलांनी शिंदे यांच्याशी हुज्जत घालत त्यांच्यावर हात उगारला. या दरम्यान झालेल्या झटापटीत शिंदे यांच्यासोबत असलेल्या त्यांच्या पुतण्याच्या कानावर चापट बसली. त्याचा जाब विचारल्याने संतापलेल्या महिलांनी शिंदे यांना दगडाने मारहाण केली तसेच हाताबुक्यांनी व लाथांनी मारहाण केली. या हल्ल्यात शिंदे यांच्या डोक्याला दुखापत होऊन रक्तस्त्राव झाला.
जखमी अवस्थेत शिंदे यांनी प्रथम लोणी काळभोर पोलिस ठाण्यात धाव घेतली. पोलिसांनी त्यांना वैद्यकीय तपासणीसाठी पाठविले. त्यानंतर त्यांनी ससून रुग्णालयात उपचार घेतले व वैद्यकीय अहवालासह पुन्हा लोणी काळभोर पोलीस ठाण्यात तक्रार नोंदवली. त्यानुसार तीन महिलांविरुद्ध भारतीय न्याय संहिता (BNS) 2023 मधील कलम 118(1) व 3(5) अन्वये गुन्हा दाखल करण्यात आला आहे.
