माढा : माढ्यात दोन मजुरांना हात बांधून, शिविगाळ व लाथा बुक्क्यांनी बेदम मारहाण केल्याची धक्कादायक घटना भुताष्टे (ता.माढा) येथे उघडकीस आली आहे. याप्रकरणी माढा पोलीस ठाण्यात चार जणांवर गुन्हा दाखल झाला आहे. तर या मारहाणीचा व्हिडीओ सोशल मिडीयावर व्हायरल झाला आहे.
विकास नाईकवाडे आणि कसबे अशी मारहाण करण्यात आलेल्या मजुरांची नावे आहेत. तर बालाजी मोरे, भालचंद्र अनंज यादव याच्यासह चार जणांवर माढा पोलीस ठाण्यात अॅट्रोसिटी, मारहाण आणि अपहाराचा गुन्हा दाखल करण्यात आला आहे.
मिळालेल्या माहितीनुसार, विकास नाईकवाडे आणि कसबे हे दोघे मजूर आहेत. ते दोघेजण भुताष्टे गावामध्ये लाईट पोलचे मुकादम असलेल्या बालाजी मोरे यांच्याकडे काम करत होते. बालाजी मोरे यांनी दोन्ही मजुरांना कामाचे पैसे घ्यायला या, असे म्हणून बोलाविले होते. कामाचे पैसे घेण्यासाठी आलेल्या दोन्ही मजुरांना आरोपींनी एका पत्र्याच्या खोलीत नेले.
त्यानंतर दोन्ही मजुरांचे हात पाठीमागून बांधण्यात आलेत. त्यानंतर लाथा बुक्क्यांनी, केस ओढून, कानशिलात लगावत, दोघा मजुरांना शिविगाळ करत बेदम मारहाण करण्यात आली आहे. शिविगाळ करत मारहाण करतानाहा हा संतापजनक व्हिडीओ समोर आल्यानंतर माढा पोलिसांनी या घटनेप्रकरणी चार जणांवर अॅट्रोसिटी, मारहाण आणि अपहाराचा गुन्हा दाखल केला आहे.
दरम्यान, या दोन्ही मजुरांना आरोपींनी नेमकी मारहाण का केली? त्यांची नेमकी चूक काय होती? याची माहिती अद्याप समजलेली नाही. तसेच अमानुष मारहाण करणाऱ्यांविरोधात माढा पोलीस नेमकी काय कारवाई करणार? हेही लवकरच स्पष्ट होईल.
