पुणे : बेकायदेशीररीत्या बांधकाम केले आहे. तुमचे नगरसेवक पद घालवितो. अशी धमकी देवून विमाननगर भागातील भाजपच्या माजी नगरसेविकेच्या पतीला एका माहिती अधिकार कार्यकर्त्याने २५ लाखांची खंडणी मागितल्याचा धक्कादायक प्रकार उघडकीस आला आहे. याप्रकरणी एका कथित माहिती अधिकार कार्यकर्त्याच्या विरोधात विमानतळ पोलीस ठाण्यात खंडणीचा गुन्हा दाखल करण्यात आला.
जितेंद्र अशोक भोसले (रा. विमाननगर) असे गुन्हा दाखल करण्यात आलेल्या माहिती अधिकार कार्यकर्त्याचे नाव आहे. याप्रकरणी भाजपच्या माजी नगरसेविकेच्या पतीने विमानतळ पोलीस ठाण्यात फिर्याद दिली.
पोलिसांनी दिलेल्या माहितीनुसार, जितेंद्र भोसले याच्या विरुद्ध यापूर्वी खंडणीचे गुन्हे दाखल आहेत. भाजपच्या माजी नगरसेविकेच्या पतीने मिळकतीत बेकायदा बांधकाम करण्यात आल्याचा आरोप भोसले यांनी केला होता. त्याने महापालिका तसेच पुणे महानगर क्षेत्र विकास प्राधिकरणात (पीएमआरडीए) तक्रार अर्ज केले होते.
दरम्यान, मिळकतीतील बांधकामाची तपासणी करुन बेकायदा बांधकाम झाले नसल्याचा अहवाल देण्यात आला होता. त्यानंतर आगामी महापालिका निवडणुकीत तुमची बदनामी करतो. समाजमाध्यमातून बदनामी करण्याची धमकी देऊन भोसलेने नगरसेविका तसेच तिच्या पतीकडे २५ लाखांची खंडणी मागितली.
त्यानंतर नगरसेविकेच्या पतीने खंडणी विरोधी पथकाकडे तक्रार दिली. तक्रार अर्जाची चौकशी करुन गुन्हा दाखल करण्यात आला आहे. तरी पुढील तपास पोलीस निरीक्षक बालाजी पांढरे करीत आहेत.
