Crime : पुणेच्या शिवाजीनगर परिसरात ऑनलाईन डिलिव्हरी सेवेदरम्यान घडलेल्या एका धक्कादायक प्रकाराने महिलांच्या सुरक्षिततेचा प्रश्न पुन्हा एकदा ऐरणीवर आला आहे. घरपोच सामान देण्यासाठी आलेल्या डिलिव्हरी बॉयने तरुणीशी गैरवर्तन केल्याची घटना 6 मार्च रोजी घडली. या प्रकरणी संबंधित तरुणीने तक्रार दिल्यानंतर पोलिसांनी आरोपीविरुद्ध विनयभंगाचा गुन्हा नोंदवला असून त्याचा शोध सुरू आहे.
माहितीनुसार, शिवाजीनगरमध्ये राहणाऱ्या एका विवाहित तरुणीने घरगुती सामान मागवण्यासाठी Porter या ऑनलाईन लॉजिस्टिक ॲपचा वापर केला होता. सायंकाळी सुमारे 5 वाजण्याच्या सुमारास डिलिव्हरी बॉय श्रीधर कांबळे पार्सल घेऊन तिच्या घरी पोहोचला. तरुणीने दरवाजा उघडून सामान स्वीकारले. त्यानंतर त्याने पिण्यासाठी पाणी मागितले. माणुसकीच्या नात्याने तिने त्याला पाणी दिले; मात्र याच क्षणाचा गैरफायदा घेत आरोपीने तिच्या हाताला स्पर्श करत “तू खूप सुंदर दिसतेस” असे म्हणत अयोग्य वर्तन केले.
या घटनेवेळी घरात तरुणीची सासू आणि तिचे लहान बाळ उपस्थित होते. अचानक घडलेल्या या प्रकारामुळे तरुणी घाबरून गेली. तिने तातडीने आपल्या पतीला माहिती दिली आणि नंतर शिवाजीनगर पोलीस ठाण्यात जाऊन तक्रार नोंदवली. तपासादरम्यान परिसरातील CCTV फुटेजमध्ये आरोपीचे हालचाली स्पष्टपणे दिसत असल्याचे समोर आले आहे.
अलीकडच्या काळात ऑनलाईन डिलिव्हरी सेवांचा वापर मोठ्या प्रमाणावर वाढला आहे. शहरांमध्ये दररोज हजारो डिलिव्हरी बॉय घराघरांत जात असल्याने ग्राहकांची सुरक्षितता हा महत्त्वाचा मुद्दा बनला आहे. त्यामुळे अशा घटनांनंतर सेवा देणाऱ्या कंपन्यांनी कर्मचाऱ्यांची पार्श्वभूमी तपासणी अधिक कडक करणे आणि ग्राहकांसाठी सुरक्षितता नियम लागू करणे आवश्यक असल्याचे तज्ज्ञांचे मत आहे.
तसेच नागरिकांनीही डिलिव्हरी घेताना शक्यतो घरात इतर सदस्य उपस्थित असणे, दरवाजा पूर्णपणे न उघडणे किंवा सोसायटीच्या प्रवेशद्वारावरच सामान स्वीकारणे अशा मूलभूत खबरदारी घेणे गरजेचे असल्याचे सांगितले जात आहे.
