पुणे : मैत्रिणीसोबत टेकडीवर फिरण्यासाठी गेलेल्या तरुणाचा तीन हल्लेखोरांनी धारदार शस्त्रांनी वार करून निर्घृण खून केल्याची धक्कादायक घटना तळजाई टेकडी परिसरात गुरुवारी सायंकाळी घडली आहे.
साहिल चांगदेव कसबे (वय १९, रा. अप्पर इंदिरानगर) असं खून झालेल्या तरुणाचं नाव आहे.
याप्रकरणी साहिलचा भाऊ अनिकेत (वय-२२) याने सहकारनगर पोलिस ठाण्यात फिर्याद दिली आहे. याप्रकरणी तिघांवर सहकारनगर पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, गुरुवारी सायंकाळी साहिल हा त्याच्या मैत्रिणीसोबत टेकडीवर फिरायला गेला होता. त्यावेळी दुचाकीवरून आलेल्या टोळक्याने त्याला हटकले. काही वेळातच या टोळक्याने त्याच्यावर सशस्त्र हल्ला चढवला. त्याला लाथाबुक्क्यांनी मारहाण करण्यात आली.
धारदार चाकूने त्याच्या छातीवर आणि डोक्यावर वार करण्यात आले. त्याच्या शरीरावर शस्त्राचे वार झाल्याने साहिल जागीच रक्ताच्या थारोळ्यात कोसळला. त्यानंतर हल्लेखोर पसार झाले.
दरम्यान, याप्रकाराने घाबरलेल्या साहिलच्या मैत्रिणीने साहिलच्या मित्रांना घटनास्थळी बोलावून घेतले. त्यांनी साहिलला जवळच्या रुग्णालयात नेले. मात्र, उपचारापूर्वीच त्याचा मृत्यू झाला होता. या घटनेची माहिती मिळताच सहकारनगर पोलिसांचे पथक घटनास्थळी दाखल झाले.
साहिलवर हल्ला केलेल्या संशयितांची नावे पोलिसांना समजली असून पोलीस त्यांचा शोध घेत असून पोलीस निरीक्षक (गुन्हे) प्रकाश पासलकर हे याप्रकरणी अधिक तपास करत आहेत.
