पुणे: संपूर्ण महाराष्ट्रात गेल्या 3 ते 4 दिवसांपासून पावसाने रौद्र रूप धारण केले आहे. एकाच वेळी 3 सायक्लोनिक सर्क्युलेशन प्रणाली सक्रिय झाल्याने राज्याच्या विविध भागांत पावसाचा जोर प्रचंड वाढला आहे. बंगालच्या उपसागरात निर्माण झालेला कमी दाबाचा पट्टा आता बिहारच्या दिशेने सरकत आहे, ज्याचा थेट परिणाम म्हणून मध्य भारत आणि महाराष्ट्रात पावसाचा मारा सुरू आहे.
हवामान तज्ज्ञांच्या माहितीनुसार, बंगालच्या उपसागरात निर्माण झालेला कमी दाबाचा पट्टा आणि महाराष्ट्रातील अनुकूल हवामान प्रणालीमुळे पावसासाठी पोषक स्थिती तयार झाली आहे. पुढील 5 दिवस ढगाळ वातावरण राहणार असून तापमानाचा पारा 32 ते 35 अंश सेल्सिअसच्या दरम्यान स्थिर राहील. पावसाच्या विश्रांतीच्या काळात हवेतील आर्द्रता 60 ते 80 टक्क्यांपर्यंत वाढणार असल्याने, अधूनमधून दमट हवामानाचा उकाडा जाणवू शकतो, असा अंदाज वर्तवण्यात आला आहे.
केवळ कोकण, पुणेच नव्हे, तर विदर्भ आणि पश्चिम महाराष्ट्रातही आगामी काळात अतिवृष्टीचा इशारा हवामान विभागाने दिला आहे. सलग पडणाऱ्या पावसामुळे नद्या आणि नाले दुथडी भरून वाहत आहेत, तर सखल भागात पाणी साचल्याने सामान्य नागरिकांचे हाल होत आहेत.
सध्या मध्य भारताच्या विविध भागांत पावसाची सक्रियता मोठी आहे. सध्या 3 सायक्लोनिक सर्क्युलेशन प्रणाली कार्यरत आहेत. बिहारच्या दिशेने सरकलेला कमी दाबाचा पट्टा आणि इतर कारणांमुळे मुंबई, ठाणे व उपनगरांत आधीच मुसळधार पाऊस सुरू आहे. याचा थेट परिणाम म्हणून आता जळगावसह विदर्भ आणि पश्चिम महाराष्ट्रातही पावसाचे वातावरण सक्रिय होणार आहे.
हा पाऊस खरीप पिकांसाठी एकप्रकारे वरदान ठरणार असून पिकांना यामुळे नवसंजीवनी मिळणार आहे. मात्र, पावसाचा जोर लक्षात घेता नागरिकांनी विशेष काळजी घेणे आवश्यक आहे.
