पुणे प्राईम न्यूज डेस्क: डिजिटल पेमेंटच्या क्षेत्रात भारत आणखी एक क्रांतिकारी पाऊल उचलण्याच्या तयारीत आहे. युनिफाइड पेमेंट्स इंटरफेस (UPI) प्रणाली लवकरच इतकी स्मार्ट होणार आहे की, वापरकर्त्यांना व्यवहारासाठी मोबाइल अॅप उघडण्याची गरजच भासणार नाही. कार, स्मार्ट टीव्ही, स्मार्टवॉच आणि अन्य उपकरणांद्वारे थेट पेमेंट करता येणार आहे.
NPCI तयार करत आहे स्मार्ट UPI
नॅशनल पेमेंट्स कॉर्पोरेशन ऑफ इंडिया (NPCI) एक स्मार्ट UPI प्रणाली विकसित करत आहे जी इंटरनेट ऑफ थिंग्ज (IoT) आधारित असेल. या प्रणालीत, प्रत्येक स्मार्ट डिव्हाइसला स्वतंत्र UPI आयडी (VPA) दिला जाईल, जो वापरकर्त्याच्या मूळ UPI आयडीशी लिंक केला जाईल.
यामुळे वापरकर्ता आपल्या स्मार्ट डिव्हाइसवरून अॅप न उघडता थेट पेमेंट करू शकेल. सुरुवातीला एकदाच OTP द्वारे डिव्हाइस लिंक करणे आवश्यक असेल.
व्यवहार कसा होईल?
ही प्रणाली UPI ऑटो पे आणि UPI सर्कल वैशिष्ट्यांवर आधारित असेल. याचा अर्थ, एकदाच परवानगी दिल्यानंतर उपकरणं विशिष्ट मर्यादेत आपोआप पेमेंट करू शकतील. हे विशेषतः सबस्क्रिप्शन रिन्यूअल, पार्किंग फी, तिकिट बुकिंग यांसारख्या बाबींमध्ये उपयुक्त ठरणार आहे.
2025 मध्ये होणार लॉन्च
बिझनेस स्टँडर्डच्या अहवालानुसार, ही प्रणाली NPCI च्या वार्षिक इनोव्हेशन योजनेचा भाग आहे. ग्लोबल फिनटेक फेस्टिव्हल (GFF) 2025 मध्ये हे फीचर सादर होण्याची शक्यता आहे. सध्या या योजनेला नियामक संस्थांकडून मंजुरीची वाट पाहावी लागत आहे.
काय बदलेल तुमच्यासाठी?
१) अॅप न उघडता स्मार्टवॉचमधून पेमेंट
२) कारमधून पार्किंग फी किंवा टोलचे थेट पेमेंट
३) स्मार्ट टीव्हीद्वारे OTT सबस्क्रिप्शनचे ऑटो रिन्यूअल
४) सोप्या व जलद व्यवहारांची सुविधा
डिजिटल पेमेंट क्रांतीमध्ये ही एक नवी भर ठरणार असून, भविष्यात पेमेंटसाठी फोन हातात घ्यायची गरज पडणार नाही.
