अहिल्यानगर: राज्याच्या पर्यावरणमंत्री पंकजा मुंडे यांचे स्वीय सहायक अनंत गर्जे यांच्या पत्नी डॉ. गौरी पालवे-गर्जे (Dr. Gauri Palave-Garje) यांच्या अंत्यसंस्कारावेळी सोमवारी (24 नोव्हेंबर) त्यांच्या मूळगावी अहिल्यानगर येथील मोहोज देवढे येथे मोठा तणाव निर्माण झाला. गौरी यांच्या पार्थिवाला अनंत गर्जे यांच्या घरासमोरच अग्नी देण्याचा पालवे कुटुंबीयांचा आग्रह आणि यावरून दोन्ही कुटुंबांतील नातेवाईकांमध्ये झालेल्या बाचाबाचीमुळे गावात तणावाचे वातावरण होते. (Gauri Garje Latest Update)
शनिवारी मुंबईतील राहत्या घरी डॉ. गौरी पालवे गर्जे यांनी गळफास घेऊन आत्महत्या केल्याची धक्कादायक घटना घडली होती. प्राथमिक माहितीनुसार, अनंत गर्जे यांच्या कुटुंबीयांकडून होणाऱ्या त्रासाला कंटाळून डॉ. गौरी यांनी हे टोकाचे पाऊल उचलल्याचे बोलले जात होते. मात्र, गौरी यांच्या कुटुंबीयांनी ही आत्महत्या नसून हत्या असल्याचा गंभीर आरोप केला आहे.
घरासमोरच अंत्यसंस्काराचा आग्रह
सोमवारी दुपारी डॉ. गौरी पालवे-गर्जे यांचे पार्थिव त्यांच्या मूळगावी, मोहोज देवढे येथे आणण्यात आले. यावेळी पालवे कुटुंबीयांच्या नातेवाईकांनी अनंत गर्जे यांच्या घरासमोरच गौरी यांच्यावर अंत्यसंस्कार करण्याचा तीव्र आग्रह धरला. या भूमिकेमुळे गर्जे कुटुंबीय आणि पालवे कुटुंबीयांच्या नातेवाईकांमध्ये जोरदार बाचाबाची झाली.
पोलिसांची मध्यस्थी आणि कडेकोट बंदोबस्त
परिस्थिती चिघळत असल्याचे पाहून घटनास्थळी उपस्थित पोलिसांनी तातडीने मध्यस्थी केली आणि दोन्ही बाजूच्या नातेवाईकांना शांत करण्याचा प्रयत्न केला. अखेर, पोलिसांच्या हस्तक्षेपानंतर हा वाद मिटवण्यात आला आणि अनंत गर्जे यांच्या घराशेजारीच डॉ. गौरी पालवे यांच्या पार्थिवाला अग्नी देण्यात आला.
सध्या मोहोज देवढे गावात तणावाचे वातावरण असून, कोणताही अनुचित प्रकार घडू नये यासाठी कडेकोट पोलीस बंदोबस्त तैनात करण्यात आला आहे. सध्या परिस्थिती नियंत्रणात असल्याची माहिती समोर येत आहे. या प्रकरणाचा तपास सुरू असून, पोलिसांनी अनंत गर्जेला अटक केली आहे.
