Crime News: बुलढाणा : ज्या हातांनी संरक्षण द्यायचं, त्याच हातांनी कुऱ्हाड चालवली… बुलढाणा जिल्ह्यातून एक अशी बातमी समोर आली आहे, जी ऐकून सर्वांचं काळीज पिळवटून निघेल. एका माथेफिरू पतीने आपल्या झोपेत असलेल्या पत्नीचा जीव घेतलाच, पण पोटच्या ४ वर्षांच्या चिमुरड्यावरही कुऱ्हाडीने सपासप वार केले. या घटनेनंतर गावात एकच खळबळ उडाली आहे.
मेहकर शहरातील एका भागात चारित्र्याच्या संशयावरून पतीने पत्नी आणि लहान मुलाची निर्घृण हत्या केल्याची घटना घडली. राहुल हरी म्हस्के वय 35 असे आरोपी पतीचे नाव आहे. तो आपल्या पत्नी रूपाली वय 30 आणि मुलगा रियांश वय 4 यांच्यासोबत राहत होता. रविवारी रात्री सर्वजण झोपेत असताना राहुलने अचानक कुऱ्हाडीने पत्नी आणि मुलावर सपासप वार केले. डोक्यावर गंभीर वार लागल्याने दोघेही रक्ताच्या थारोळ्यात पडले.
या हल्ल्याचा आवाज ऐकून राहुलची आई जागी झाली आणि त्यांनी आरडाओरड केली. मात्र तोपर्यंत उशीर झाला होता. गंभीर जखमी झालेल्या रूपालीला उपचारासाठी रुग्णालयात दाखल करण्यात आले, मात्र उपचारादरम्यान तिचा मृत्यू झाला. या हल्ल्यात चिमुकल्या रियांशचाही जागीच मृत्यू झाला. या घटनेमुळे परिसरात भीती आणि संतापाचे वातावरण पसरले आहे.
या प्रकरणी मृत रूपालीचे वडील भास्कर वानखेडे यांनी मेहकर पोलिस ठाण्यात तक्रार दाखल केली आहे. तक्रारीच्या आधारे पोलिसांनी आरोपी पती राहुल म्हस्के याच्याविरोधात खुनाचा गुन्हा दाखल केला असून पुढील तपास सुरू आहे. या घटनेनंतर महाराष्ट्र सून्न झालं आहे.
