Nashik News : नाशिक : नाशिकच्या इंदिरानगर परिसरात गॅस गळतीमुळे भीषण स्फोट झाला आहे. कलानगर चौकातील वक्रतुंड पार्सल पॉईंट येथे ही दुर्घटना घडली. यात दोन जण जखमी झाले आहेत. सिलेंडरची जोडणी करताना गॅस गळती झाल्यामुळे ही घटना घडल्याची प्राथमिक माहिती मिळत आहे. पार्सल पॉईंटवर सोमवारी 01 जानेवारीला सकाळी गॅस गळतीमुळे अचानक भडका उडला.
सकाळी पार्सल पॉईंटचे दुकान उघडल्यानंतर दोन व्यक्तींनी इलेक्ट्रिक सप्लायचे बटन सुरु केले. त्यानंतर मोठा भडका उडाला. यानंतर दुकानात असलेले दोन जण आणि दुकानातील सामानदेखील यावेळी बाहेर फेकले गेले. यात दोन जण ५० ते ६० टक्के भाजले असल्याचे समजते.
रात्रीच्या वेळी गॅस गळती झाली असावी असा प्राथमिक अंदाज व्यक्त होत आहे. घटनेची माहिती मिळताच पोलीस घटनास्थळी दाखल झाले. दरम्यान, मोबाईलच्या बॅटरीचा स्फोट झाला असावा किंवा अल्कोहोलिक परफ्युमला आग लागल्याने ती भडकली असावी अशी परिसरात जोरदार चर्चा रंगली होती. मात्र गॅस गळतीमुळे हा स्फोट झाल्याचे पोलीस तपासात निष्पन्न झाले होते.
