Accident News: नाशिक : नाशिक–पुणे महामार्गावरील (Nashik Pune highway accident) मोहदरी घाट हा अपघातांसाठी मालिका काही संपतच नाही. अशातच बुधवारी सकाळी येथे भीषण अपघात झाला. अनियंत्रित कंटेनरने दुभाजक ओलांडून दिलेल्या जोरदार धडकेत तीन जणांचा जागीच मृत्यू झाला. या दुर्घटनेत आयटी अभियंता, भाजीपाला व्यापारी आणि एका दुचाकीस्वाराचा समावेश आहे. या घटनेनंतर परिसरात हळहळ व्यक्त केली जात असून महामार्गावरील सुरक्षेबाबत पुन्हा प्रश्न उपस्थित झाले आहेत.
बुधवारी सकाळी सुमारे 10:15 वाजता मोहदरी घाटात हा अपघात घडला. सिन्नरकडून नाशिककडे जाणारा कंटेनर MH 46 AR 2725 चालकाचे नियंत्रण सुटल्याने दुभाजक तोडून विरुद्ध लेनमध्ये गेला. त्याच वेळी नाशिककडून सिन्नरकडे जाणारी महिंद्रा पिकअप MH 15 GV 7149 आणि एक दुचाकी MH 15 CB 6796 या कंटेनरच्या तडाख्यात सापडल्या. धडक इतकी भीषण होती की कंटेनर आणि पिकअप दोन्ही वाहने उलटली, तर दुचाकीस्वार कंटेनरखाली चिरडला गेला.
या अपघातात बाळासाहेब बाजीराव व्यापारी वय 42, नाशिक येथील भाजीपाला व्यापारी, अवधूत रामनाथ निर्मळ वय 23, आयटी अभियंता आणि शाजी फर्नांडो वय 50, दुचाकीस्वार यांचा मृत्यू झाला. घटनेनंतर काही वेळ महामार्गावरील वाहतूक विस्कळीत झाली होती. पोलिस आणि स्थानिक नागरिकांनी मदतकार्य करत मृतदेह बाहेर काढले.
या अपघातातील सर्वात हृदयद्रावक बाब म्हणजे 23 वर्षीय अवधूत निर्मळचा मृत्यू. त्याची नुकतीच मुंबईतील एका नामांकित कंपनीत आयटी अभियंता म्हणून निवड झाली होती. तो आई-वडिलांचा एकुलता एक मुलगा होता. सुट्टीसाठी नाशिकला आला असताना तो आपल्या नातेवाईक बाळासाहेब व्यापारी यांच्या पिकअपमधून गावी जात होता. मात्र, घर गाठण्याआधीच त्याचा दुर्दैवी अंत झाला.
या अपघातामुळे मोहदरी घाटातील वाहतूक सुरक्षिततेचा मुद्दा पुन्हा चर्चेत आला असून प्रशासनाने तातडीने उपाययोजना कराव्यात, अशी मागणी नागरिकांकडून होत आहे.
