नाशिक: स्वतःला अंकशास्त्रज्ञ, ज्योतिष म्हणवून घेणारा आणि राजकीय वर्तुळात वावरणारा कॅप्टन अशोक खरात याला बलात्काराच्या गंभीर आरोपांखाली अटक करण्यात आली आहे. या अटकेनंतर नाशिकसह संपूर्ण महाराष्ट्रात एकच खळबळ उडाली असून, आध्यात्मिक शक्तीच्या नावाखाली महिलांचे शोषण करण्याचे एक मोठे रॅकेट उघडकीस येण्याची शक्यता वर्तवली जात आहे.
अशोक खरात हा मंत्रतंत्र, अंकशास्त्र आणि दैवी शक्तीचा दावा करून महिलांना जाळ्यात ओढत असे. अडचण निवारण्याच्या बहाण्याने महिलांचा विश्वास संपादन करून त्यांच्यावर शारीरिक अत्याचार केल्याचे आरोप त्याच्यावर आहेत. गुन्हे शाखेच्या युनिट 1 ने बुधवारी पहाटे ही कारवाई केली. न्यायालयाने खरातला 24 मार्चपर्यंत पोलीस कोठडी सुनावली आहे.
खरातच्या कॅनडा कॉर्नर येथील कार्यालयाची झडती घेतली असता, पोलिसांच्या हाती एक महत्त्वाचा ‘पेन ड्राईव्ह’ लागला आहे. मिळालेल्या प्राथमिक माहितीनुसार, या पेन ड्राईव्हमध्ये तब्बल 58 व्हिडिओ आढळले आहेत. हे व्हिडिओ पीडित महिलांचे असण्याची शक्यता असून, त्याआधारे खरात ब्लॅकमेलिंग करत होता का, याचा तपास आता पोलीस करत आहेत. या व्हिडिओंच्या माध्यमातून अनेक बड्या नावांचे धागेदोरे समोर येण्याची भीती व्यक्त होत आहे.
या प्रकरणाने आता राजकीय वळण घेतले आहे. राज्य महिला आयोगाच्या अध्यक्षा रूपाली चाकणकर यांनी खरातची पूजा केल्याचा एक जुना फोटो समोर आल्याने विरोधकांनी आक्रमक पवित्रा घेतला आहे. या प्रकरणाची व्याप्ती आणि गांभीर्य लक्षात घेऊन राज्य सरकारने एसआयटी (SIT) स्थापन केली आहे. आयपीएस अधिकारी तेजस्वी सातपुते यांच्याकडे या तपासाची जबाबदारी सोपवण्यात आली आहे. सातपुते यांची यापूर्वीची कामगिरी पाहता, या प्रकरणातील पीडितांना न्याय मिळेल, अशी आशा व्यक्त होत आहे.
