छत्रपती संभाजीनगर: छत्रपती संभाजीनगर शहरातील छावणी परिसरातील एका शाळेत धक्कादायक घटना घडली आहे. टीसी (शाळा सोडल्याचा दाखला) घेण्यासाठी आलेल्या अल्पवयीन विद्यार्थ्याने शिक्षकावर चाकूने हल्ला केल्याची घटना समोर आली आहे. या हल्ल्यात शिक्षक गंभीर जखमी झाले असून त्यांच्यावर शासकीय रुग्णालयात उपचार सुरू आहेत. पोलिसांनी आरोपी विद्यार्थ्याला ताब्यात घेतले असून पुढील तपास सुरू आहे.
प्राथमिक माहितीनुसार, संबंधित विद्यार्थी टीसी घेण्यासाठी शाळेत आला होता. यापूर्वीही शाळेत शिकत असताना त्याचा वर्गशिक्षकांसोबत वाद झाला होता. टीसी घेण्याच्या प्रक्रियेदरम्यान दोघांमध्ये पुन्हा शाब्दिक वाद झाला.
वाद वाढल्यानंतर विद्यार्थ्याने सोबत आणलेल्या चाकूने शिक्षकावर थेट हल्ला केला. या हल्ल्यात शिक्षक धूशिंग गंभीर जखमी झाले. शाळेतील कर्मचाऱ्यांनी त्यांना तातडीने शासकीय रुग्णालयात दाखल केले असून त्यांच्यावर उपचार सुरू आहेत.
घटनेची माहिती मिळताच पोलिसांनी घटनास्थळी धाव घेत आरोपी अल्पवयीन विद्यार्थ्याला ताब्यात घेतले. प्राथमिक तपासात हा चाकू विद्यार्थ्याने ऑनलाइन खरेदी केल्याची माहिती समोर आली आहे.
या हल्ल्यामागील नेमके कारण काय होते, विद्यार्थ्याने पूर्वनियोजित कटातून हल्ला केला का, याचा तपास पोलीस करत आहेत. या घटनेमुळे शहरात खळबळ उडाली असून शाळांमधील सुरक्षेचा प्रश्न पुन्हा ऐरणीवर आला आहे.
