बीड: बीडमध्ये शनिवारी मनोज जरांगे-पाटील यांची ‘निर्णायक इशारा सभा’ पार पडली. या सभेत जरांगे-पाटील यांनी मोठी घोषणा केली आहे. मुंबईत २० जानेवारीला आमरण उपोषण करणार, असं जरांगे-पाटलांनी जाहीर केलं आहे. आता मराठ्यांवर दबाव टाकणं सोपे नाही, असा इशाराही जरांगे-पाटलांनी सरकारला दिला आहे.
मनोज जरांगे-पाटील म्हणाले, “सरकारनं मराठ्यांना नोटीसा दिल्या आणि मुंबईत १८ जानेवारीपर्यंत १४४ कलम लागू केलं आहे. त्यामुळे २० जानेवारीला मुंबईत आमरण उपोषण करण्यात येईल. २० जानेवारीला मुंबईतील आझाद मैदानावर मी आमरण उपोषण करणार आणि मला भेटण्यासाठी मराठे येतील.” असंही जरांगे म्हणाले.
आम्ही शांततेच्या आणि कायदेशीर मार्गानं आपण उपोषण करू. पण, कोण कुठं बसेल माहिती नाही. रोड मोकळे करून बसण्याची व्यवस्था करावी. नाहीतर आमच्या धोरणाने आम्ही बसू. मात्र, मराठ्यांनी मुंबईकडे कूच केली, तर विराट समुदाय परत फिरणार नाही. आरक्षण घेऊनच माघारी फिरू,” असा इशारा मनोज जरांगे-पाटलांनी सरकारला दिला आहे.
