बीड: चित्रपटात अनेकदा व्हिलन लक्षात राहतो, मात्र हिरो लक्षात (Dhananjay Munde) राहत नाही, ही मानसिकता बदलायला हवी, असे वक्तव्य (Beed News) राष्ट्रवादी काँग्रेस अजित पवार गटाचे आमदार धनंजय मुंडे यांनी केले. ते बीड जिल्ह्यातील परळी( Parali News) तालुक्यातील धर्मापुरी येथील एका विद्यालयात आयोजित कार्यक्रमात विद्यार्थ्यांशी संवाद साधताना बोलत होते. (Latest Marathi News)
या कार्यक्रमात भाषण करताना धनंजय मुंडे यांनी विद्यार्थ्यांना प्रश्न विचारत एखादा हिंदी चित्रपट आठवतो का, असे विचारले. त्यावर विद्यार्थ्यांनी ‘धुरंधर’ या चित्रपटाचे नाव सांगितले. त्यानंतर या चित्रपटातील नायक कोण आहे, असा सवाल त्यांनी केला असता विद्यार्थ्यांनी अक्षय खन्ना असे उत्तर दिले. यावेळी धनंजय मुंडे यांनी विद्यार्थ्यांकडे हात जोडत खंत व्यक्त केली. आजची परिस्थिती अशी आहे की चित्रपटातील व्हिलन जास्त लक्षात राहतो, पण हिरो लक्षात राहत नाही. ही मानसिकता समाजात बदलायला हवी, अशी अपेक्षा त्यांनी व्यक्त केली. कठीण परिस्थितीतही आम्ही राजकारणात संघर्ष करत आहोत, असेही त्यांनी यावेळी सांगितले.
दरम्यान, धनंजय मुंडे लवकरच भाजपमध्ये प्रवेश करतील, अशा चर्चांना राजकीय वर्तुळात पुन्हा उधाण आले आहे. राष्ट्रवादी काँग्रेस अजित पवार गटाचे आमदार माणिकराव कोकाटे यांना बनावट कागदपत्रांच्या आधारे शासकीय सदनिका लाटल्याच्या प्रकरणात नाशिक सत्र न्यायालयाने दोन वर्षांची शिक्षा सुनावल्यानंतर मंत्रिमंडळातील रिक्त जागेवर कोणाची वर्णी लागणार, याबाबत चर्चा सुरू झाली होती. कोकाटे यांच्या राजीनाम्यानंतर धनंजय मुंडे यांच्या नावाची जोरदार चर्चा होत आहे.
यापूर्वी धनंजय मुंडे यांनी दिल्लीमध्ये जाऊन अमित शाह यांची भेट घेतल्याची माहिती समोर आली होती. त्यामुळे ते भाजपमध्ये जाणार का, तसेच त्यांना पुन्हा मंत्रीपदाची संधी मिळणार का, याबाबत तर्कवितर्कांना वेग आला आहे. मात्र या चर्चांवर अद्याप कोणतीही अधिकृत भूमिका समोर आलेली नाही.
