छत्रपती संभाजीनगर: छत्रपती संभाजीनगरमध्ये (Crime News) कौटुंबिक वादातून मध्यरात्री दगडफेक केल्याची धक्कादायक घटना समोर आली आहे. पत्नी माहेरी नसल्याच्या रागातून (Chhatrapati Sambhajinagar News) संतापलेल्या पतीने मित्रासह सासरवाडी गाठत घरावर दगडफेक केली. ही घटना 16 फेब्रुवारी रोजी रात्री सुमारे 1 वाजण्याच्या सुमारास मुकुंदवाडी परिसरातील समतानगर येथे घडली.
याप्रकरणी मंदा अंबादास खरात (वय 65) यांनी मुकुंदवाडी पोलिस ठाण्यात तक्रार दाखल केली आहे. तक्रारीनुसार, त्या 16 फेब्रुवारीच्या रात्री पतीसह घरी असताना अचानक दरवाजावर जोरात आवाज झाला. त्यांनी खिडकीतून पाहिले असता त्यांचा नातजावई संघर्ष बोर्डे आणि त्याचा मित्र महेश हेल्लोडे हे घराबाहेर उभे असल्याचे दिसले.
संघर्ष बोर्डे हा घरासमोर उभा राहून मोठ्याने शिवीगाळ करत होता. “तुम्ही माझी जिंदगी बरबाद केली आहे. तुम्ही माझ्या बायकोला का पाठवत नाही?” असा जाब त्याने विचारला. त्यावर मंदा खरात यांनी, “तुझा आणि तुझ्या पत्नीचा वाद कोर्टात सुरू आहे. कोर्टात जाऊन प्रश्न सोडव. मला विनाकारण इतक्या रात्री त्रास देऊ नको,” असे सांगितले.
या उत्तरानंतर संघर्ष बोर्डे आणि महेश हेल्लोडे यांनी संतापाच्या भरात घरावर दगडफेक करण्यास सुरुवात केली. तक्रारीनुसार, दोघांनी “तुम्हाला जिवंत सोडणार नाही, तसेच तुझे दोन्ही मुलांनाही जिवंत सोडणार नाही,” अशी धमकी दिली. अचानक झालेल्या या प्रकारामुळे परिसरात खळबळ उडाली.
दगडफेकीत घराच्या खिडक्यांच्या काचा, टॉवरच्या काचा तसेच घरावर बसवलेले सीसीटीव्ही कॅमेरे यांचे नुकसान झाले आहे. या घटनेत अंदाजे 25 ते 30 हजार रुपयांचे नुकसान झाल्याचे फिर्यादीत नमूद करण्यात आले आहे.
मंदा खरात यांच्या तक्रारीवरून संघर्ष बोर्डे आणि महेश हेल्लोडे या दोघांविरोधात मुकुंदवाडी पोलिस ठाण्यात गुन्हा दाखल करण्यात आला असून पुढील तपास सुरू आहे.
