बीड: राज्यातील विविध शासकीय कार्यालयांमध्ये सुरू असलेल्या भ्रष्टाचाराविरोधातील कारवाया तीव्र होत असतानाच परळी येथे लाचखोरीचा आणखी एक मोठा प्रकार उघडकीस आला आहे. सालन्सी प्रमाणपत्र देण्यासाठी लाचेची मागणी केल्याप्रकरणी परळीचे तहसीलदार व्यंकटेश मुंडे यांना लाचलुचपत प्रतिबंधक विभागाने ताब्यात घेतले आहे. (Beed Bribe Case)
राज्यातील अन्न व औषध प्रशासन विभागातील लिपिकाला लाच स्वीकारताना अटक झाल्याची घटना ताजी असतानाच मुंबईतील मुलुंड येथे एका वरिष्ठ पोलीस अधिकाऱ्यावरही कारवाई झाली होती. या पार्श्वभूमीवर परळीतील कारवाईमुळे महसूल विभागात खळबळ उडाली आहे.
मिळालेल्या माहितीनुसार, तक्रारदाराकडून सालन्सी प्रमाणपत्र देण्यासाठी तहसीलदार मुंडे यांनी सुरुवातीला 50 हजार रुपयांची मागणी केली होती. तडजोडीनंतर 20 हजार रुपये देण्याचे ठरले. मात्र, तक्रारदाराने याबाबत एसीबी कडे तक्रार दाखल केली.
एसीबीने सापळा रचून कारवाईची तयारी केली होती. दरम्यान, तक्रारदाराच्या हालचाली संशयास्पद वाटल्याने मुंडे यांनी रक्कम स्वीकारण्यास टाळाटाळ केल्याचे सांगितले जाते. तरीदेखील एसीबीने आवश्यक पुरावे गोळा करून त्यांना ताब्यात घेतले असून पुढील कायदेशीर कारवाई सुरू करण्यात आली आहे.
या कारवाईनंतर महसूल प्रशासनात एकच खळबळ उडाली असून, गेल्या काही दिवसांपासून एसीबीच्या वाढत्या धाडसत्रामुळे अनेक अधिकारी व कर्मचाऱ्यांमध्ये धास्तीचे वातावरण आहे. मात्र, सर्वसामान्य नागरिकांची कामे मार्गी लावण्यासाठी अद्यापही काही शासकीय कार्यालयांत पैशांची मागणी होत असल्याचे वास्तव या घटनांमधून पुन्हा अधोरेखित झाले आहे.
