छत्रपती संभाजीनगर: नशेची तलफ भागवण्यासाठी पैसे कमी पडल्याने एका अल्पवयीन मुलाने थेट मंदिराला लक्ष्य करत चोरी केल्याचा प्रकार समोर आला आहे. समर्थनगरातील श्रीराम मंदिर आणि मारुती मंदिराची दानपेटी फोडून त्याने रोख रक्कम चोरली. तसेच मारुतीच्या मूर्तीचे सोन्याचे दोन डोळे आणि शेजारील लहान मारुती मूर्तीचे चांदीचे दोन डोळेही चोरून नेले. क्रांतीचौक पोलिसांनी तांत्रिक तपासाच्या आधारे अवघ्या चार तासांत या विधीसंघर्षग्रस्त बालकाला रेल्वेस्थानक परिसरातून ताब्यात घेतले. त्याच्याकडून चोरीचा मुद्देमाल जप्त करण्यात आला असून, त्याची बालसुधारगृहात रवानगी करण्यात आली आहे.
समर्थनगर येथील श्रीराम मंदिराचे पुजारी उदय विजयराव कुलकर्णी (४७) यांनी याप्रकरणी पोलिसांत तक्रार दिली. ९ सप्टेंबर रोजी रात्री दहाच्या सुमारास मंदिर बंद करून ते घरी गेले होते. दुसऱ्या दिवशी पहाटे साडेपाच वाजता मंदिरात आल्यानंतर मागील बाजूच्या चॅनेल गेटचे कुलूप तुटलेले दिसले. त्यांनी मारुती मंदिराचे पुजारी विवेक कुलकर्णी, मंदिर ट्रस्टचे अध्यक्ष माणिक रत्नपारखी, मयुरेश कोटणीस यांच्यासह विश्वस्तांना माहिती दिली.
पाहणी केली असता गेटचा कडीकोंडा तोडण्यात आल्याचे आणि लोखंडी सळईच्या साहाय्याने दानपेटी फोडल्याचे आढळले. दानपेटीतील रोख रक्कम घेण्यासोबतच मारुती मूर्तीचे सुमारे ३० हजार ५०० रुपये किमतीचे दोन सोन्याचे डोळे आणि लहान मारुती मूर्तीचे दोन चांदीचे डोळे चोरीला गेल्याचे स्पष्ट झाले.
त्यानंतर क्रांतीचौक पोलिसांनी मंदिर परिसरातील सीसीटीव्ही फुटेज तपासून संशयिताचा शोध सुरू केला. तांत्रिक माहिती आणि गुप्त बातमीदाराच्या मदतीने पोलिसांनी चार तासांत रेल्वेस्थानक परिसरातून अल्पवयीनाला ताब्यात घेतले. चौकशीत त्याने चोरी केल्याची कबुली दिल्याचे पोलिसांनी सांगितले.
पोलिसांच्या तपासानुसार, हा मुलगा नशेच्या आहारी गेला असून, यापूर्वीही त्याच्यावर दोन गुन्हे दाखल आहेत. एसटी बसस्थानक आणि रेल्वेस्थानक परिसरात चोरी करून मिळणाऱ्या पैशांतून तो नशा करत असल्याचे तपासात समोर आले आहे. याच श्रीराम मंदिरात यापूर्वीही त्याने दानपेटी फोडून चोरी केली होती. जामिनावर सुटल्यानंतर त्याने पुन्हा मंदिरांना लक्ष्य केल्याचा पोलिसांचा दावा आहे. छावणी, समर्थनगर आणि जुन्या शहरातील इतर मंदिरांमध्येही त्याने चोरी केली आहे का, याचा तपास सुरू आहे.
ही कारवाई वरिष्ठ पोलिस निरीक्षक शिवाजी तावरे यांच्या मार्गदर्शनाखाली पोलिस उपनिरीक्षक अशोक इंगोले, नेहा म्हस्के, अंमलदार संतोष मुदीराज, इरफान खान, माजीद पटेल, रविंद्र खरात, धम्मपाल लोखंडे आणि नंदू सूर्यवंशी यांच्या पथकाने केली.
