पुणे: पुणे, सोलापूरसह राज्यातील 12 जिल्हा परिषद आणि 125 पंचायत समिती निवडणुकांचा प्रचार आज (5 फेब्रुवारी) सायंकाळी थांबणार आहे. शनिवारी, 7 फेब्रुवारी रोजी या ठिकाणी मतदान प्रक्रिया पार पडणार असून सोमवारी मतमोजणी होणार आहे. या पार्श्वभूमीवर संबंधित 12 जिल्ह्यांतील शाळा, महाविद्यालये आणि सर्व शासकीय कार्यालयांना भरपगारी सुट्टी जाहीर करण्यात आली आहे. याबाबतचा शासन निर्णय महाराष्ट्र सरकारकडून जारी करण्यात आला आहे.
निवडणूक होणाऱ्या 12 जिल्ह्यांतील ग्रामीण भागात मतदानाच्या पार्श्वभूमीवर सलग तीन दिवस मद्यविक्रीवर बंदी घालण्यात आली आहे. नियमांचे उल्लंघन करणाऱ्यांवर कठोर कारवाई करण्यात येईल, असा इशाराही प्रशासनाने दिला आहे.
जिल्हा परिषद आणि पंचायत समिती निवडणुकांच्या पार्श्वभूमीवर उद्योग, खासगी कंपन्या आणि व्यावसायिक आस्थापनांमध्ये काम करणाऱ्या कर्मचाऱ्यांसाठीही शनिवारी भरपगारी सुट्टी जाहीर करण्यात आली आहे. उद्योग, कामगार आणि खाण विभागाने दिलेल्या आदेशानुसार 18 वर्षांवरील सर्व नोंदणीकृत मतदारांनी मतदानाचा हक्क बजावावा, तसेच मालकांनी कर्मचाऱ्यांना मतदानासाठी आवश्यक सवलत द्यावी, असे स्पष्ट करण्यात आले आहे. मतदानाच्या दिवशी ज्या ठिकाणी कर्मचारी नोंदणीकृत मतदार असतील, त्यांना भरपगारी रजा देणे बंधनकारक करण्यात आले आहे. तसेच या 12 जिल्ह्यांतील मतदार इतर जिल्ह्यात काम करत असतील, तरी त्यांनाही सुट्टी देण्याचे निर्देश देण्यात आले आहेत.
हा निर्णय उद्योग, ऊर्जा आणि कामगार विभागांतर्गत येणाऱ्या सर्व आस्थापनांना लागू असून त्यामध्ये कारखाने, खासगी कंपन्या, दुकाने, व्यावसायिक प्रतिष्ठाने, निवासी हॉटेल्स, भोजनालये, थिएटर, औद्योगिक युनिट्स, आयटी कंपन्या, शॉपिंग सेंटर्स, मॉल्स आणि रिटेल आउटलेट्स यांचा समावेश आहे.
दरम्यान, जिल्हा परिषद आणि पंचायत समिती निवडणुकांचा प्रचार आज रात्री 10 वाजता संपुष्टात येणार आहे. जिल्हा परिषदेच्या 73 गटांसाठी आणि पंचायत समितीच्या 146 गणांसाठी शनिवारी मतदान होणार आहे. जिल्हा परिषदेसाठी 299, तर पंचायत समितीसाठी 528 उमेदवार रिंगणात आहेत. एकूण 29 लाख 72 हजार 359 मतदार मतदानाचा हक्क बजावणार आहेत.
उपमुख्यमंत्री अजित पवार यांच्या निधनामुळे प्रचारावर काही प्रमाणात परिणाम झाल्याचे दिसून आले. जिल्ह्यात बहुतांश ठिकाणी भाजप आणि राष्ट्रवादी काँग्रेस यांच्यात थेट लढत होण्याची शक्यता असून ही निवडणूक चुरशीची ठरण्याची चिन्हे आहेत.
