Sport News : भारतीय महिला क्रिकेट संघासाठी हे वर्ष ऐतिहासिक ठरलं आहे. यंदाचा विश्वचषक जिंकत भारतीय महिला संघाने मोठी कामगिरी केली. विश्वचषकानंतरही संघाची कामगिरी घसरलेली नसून, दिवसेंदिवस संघ अधिक भक्कम होताना दिसत आहे. सध्या भारत आणि श्रीलंका यांच्यात सुरू असलेल्या टी-२० मालिकेतही भारतीय संघ दमदार खेळ करत असून, याची दखल थेट आयसीसीकडून घेण्यात आली आहे.
मात्र आयसीसीच्या ताज्या टी-२० फलंदाज क्रमवारीत भारतीय उपकर्णधार स्मृती मानधनाला नंबर वन स्थान गमवावं लागलं आहे. दक्षिण आफ्रिकेची कर्णधार लॉरा वोल्वार्ड हिने अव्वल स्थान पटकावलं असून, स्मृती मानधना तिसऱ्या क्रमांकावर घसरली आहे. तरीही स्मृती ही रँकिंगमधील सर्वोच्च स्थानावर असलेली भारतीय फलंदाज आहे.
लॉरा वोल्वार्डने आयर्लंडविरुद्धच्या घरच्या मालिकेत सलग दोन सामन्यांत १२४ आणि नाबाद १०० धावांची खेळी करत रँकिंगमध्ये मोठी झेप घेतली. याआधी तिने विश्वचषकाच्या उपांत्य आणि अंतिम सामन्यातही सलग शतके झळकावली होती. वोल्वार्डकडे सध्या ८२० रेटिंग पॉइंट्स असून, हे तिचं आजवरचं सर्वोत्तम रेटिंग आहे. ती स्मृती मानधनापेक्षा ९ गुणांनी पुढे आहे.
दरम्यान, भारताची युवा फलंदाज जेमिमा रॉड्रिग्ज हिनेही रँकिंगमध्ये मोठी झेप घेतली आहे. विश्वचषक उपांत्य फेरीत निर्णायक शतकी खेळी करणाऱ्या जेमिमाची टी-२० फलंदाजांच्या क्रमवारीत पाच स्थानांनी वाढ झाली असून, तिने थेट टॉप १० मध्ये प्रवेश केला आहे. श्रीलंकेविरुद्ध विशाखापट्टणम येथे झालेल्या सामन्यात जेमिमाने ४४ चेंडूत नाबाद ६९ धावांची खेळी केली होती. या सामन्यात तिला सामनावीर पुरस्काराने गौरवण्यात आलं होतं.
भारताची आणखी एक स्टार फलंदाज शेफाली वर्माची मात्र क्रमवारीत एक स्थान घसरण झाली आहे. तरीही ती टॉप १० मध्ये कायम आहे. सध्या शेफाली दहाव्या क्रमांकावर आहे. जेमिमा रॉड्रिग्ज टॉप १० मध्ये आल्यामुळे शेफाली एक स्थान खाली गेली आहे. विश्वचषकात शेफालीने केवळ दोन सामने खेळले असले तरी बदली खेळाडू म्हणून संधी मिळाल्यानंतर तिने उल्लेखनीय कामगिरी करत संपूर्ण स्पर्धेत आपली छाप पाडली होती.
