बेंगळुरू: आयपीएल 2026 हंगामाची सुरुवात जोरदार रंगतदार झाली असून, पहिल्याच सामन्यात रॉयल चॅलेंजर्स बेंगळुरूने सनरायझर्स हैद्राबाद वर 6 विकेट्स राखून दमदार विजय मिळवला. बंगळुरूतील चिन्नास्वामी स्टेडियम येथे झालेल्या या सामन्यात आरसीबीने 190 धावांचे आव्हान सहज पार करत हंगामाची विजयी सुरुवात केली.
सनरायझर्स हैदराबादची सुरुवात मात्र अत्यंत खराब झाली. नाणेफेक गमावून प्रथम फलंदाजी करताना त्यांनी अवघ्या 29 धावांत 3 विकेट्स गमावल्या. आरसीबीच्या पदार्पण करणाऱ्या वेगवान गोलंदाज जेकब डफीने सुरुवातीलाच मोठा प्रभाव टाकत अभिषेक शर्मा आणि ट्रॅव्हिस हेड यांना एकाच षटकात बाद केले. त्यानंतर नितीश कुमार रेड्डीलाही त्याने लवकर माघारी पाठवत हैदराबादला अडचणीत आणले.
या संकटातून कर्णधार ईशान किशन आणि हेनरिक क्लासेन यांनी संघाला सावरण्याचा प्रयत्न केला. दोघांनी महत्त्वाची भागीदारी उभी करत डावाला गती दिली. मात्र रोमारियो शेफर्डने क्लासेनला 31 धावांवर बाद करत ही जोडी फोडली. त्यानंतर सलील अरोरा स्वस्तात बाद झाला.
एकीकडे विकेट्स पडत असतानाही ईशान किशनने आक्रमक खेळ कायम ठेवत 38 चेंडूत 80 धावांची स्फोटक खेळी केली. त्याच्या खेळीत 8 चौकार आणि 5 षटकारांचा समावेश होता. शेवटी अनिकेत वर्माने 18 चेंडूत 43 धावांची तुफानी खेळी करत संघाची धावसंख्या 190 च्या पुढे नेली.
190 धावांच्या लक्ष्याचा पाठलाग करताना आरसीबीने संयमित आणि आक्रमक फलंदाजीचे मिश्रण दाखवत सामना आपल्या बाजूने झुकवला. या विजयासह आरसीबीने पॉइंट्स टेबलमध्ये 2 गुणांची नोंद केली असून, यंदाच्या हंगामात ते पुन्हा विजेतेपदासाठी सज्ज असल्याचे संकेत दिले आहेत.
