अहमदाबाद : कर्णधार सूर्यकुमार यादवच्या कल्पक (India vs Netherlands T20 World Cup 2026) नेतृत्वाखाली भारतीय संघाने विजयी घोडदौड कायम राखत अहमदाबादच्या नरेंद्र मोदी स्टेडियमवर नेदरलँड्सवर 17 धावांनी थरारक विजय मिळवला. या विजयासह टीम इंडियाने साखळी फेरीतील चारही सामने जिंकत अपराजित मोहीम दिमाखात सुरू ठेवली आहे.
भारताकडून सलामीला अभिषेक शर्मा आणि ईशान किशन मैदानात उतरले. मात्र अभिषेक पुन्हा एकदा अपयशी ठरला. पहिल्याच षटकात तो शून्यावर बाद झाला. अवघ्या 3 चेंडू खेळून माघारी परतताना त्याची या स्पर्धेतील शून्यावर बाद होण्याची हॅट्ट्रिक पूर्ण झाली. ईशान किशनने आक्रमक सुरुवात करत 18 धावा केल्या, पण तोही फार काळ टिकला नाही. त्याच्या बाद झाल्यानंतर भारताची अवस्था 39/2 अशी झाली.
त्यानंतर तिलक वर्मा (31) आणि सूर्यकुमार यादव यांनी डाव सावरला. दोघांनी संयमी फलंदाजी करत संघाला स्थिरता दिली. मात्र नेदरलँड्सच्या क्षेत्ररक्षकाने घेतलेल्या अप्रतिम झेलमुळे तिलक बाद झाला. सूर्यकुमारने 28 चेंडूत 34 धावा केल्या, पण तोही माघारी परतल्याने भारताचा स्कोअर 110/4 असा झाला.
शेवटच्या षटकांत शिवम दुबे आणि हार्दिक पांड्या यांनी तुफानी फटकेबाजी करत भारतीय डावाला वेग दिला. दुबेने 31 चेंडूत 4 चौकार आणि 6 षटकारांच्या मदतीने 66 धावांची झंझावाती खेळी केली, तर हार्दिकने 21 चेंडूत 30 धावा जोडल्या. एका क्षणी भारत 200 धावांचा टप्पा सहज पार करेल असे वाटत होते, मात्र अखेरच्या षटकात दोघेही बाद झाल्याने भारताला मोठी मजल मारता आली नाही. नेदरलँड्सच्या गोलंदाजाने 3 बळी घेत प्रभावी कामगिरी केली.
194 धावांच्या लक्ष्याचा पाठलाग करताना नेदरलँड्सने अपेक्षेपेक्षा चांगला लढा दिला. सलामीपासूनच त्यांनी भारतीय गोलंदाजांचा धैर्याने सामना केला. प्रत्येक षटकात धावगती राखत त्यांनी सामना शेवटच्या षटकापर्यंत नेला. अखेरीस नेदरलँड्सने 20 षटकांत 7 गडी गमावून 176 धावा केल्या. भारताकडून वरुण चक्रवर्तीने 3 बळी घेत निर्णायक भूमिका बजावली. शिवम दुबेने 2, तर जसप्रीत बुमराह आणि हार्दिक पांड्या यांनी प्रत्येकी 1 विकेट घेतली.
साखळी फेरीत अपराजित राहिल्यानंतर आता भारतीय संघ सुपर-8 फेरीत प्रवेश करत आहे. 22 फेब्रुवारीला बलाढ्य दक्षिण आफ्रिकेविरुद्ध अहमदाबादच्या नरेंद्र मोदी स्टेडियमवरच हाय-व्होल्टेज सामना रंगणार आहे. या लढतीकडे आता संपूर्ण देशाचे लक्ष लागले आहे.
