IND vs NZ : न्यूझीलंडविरुद्ध होणाऱ्या एकदिवसीय मालिकेसाठी आज बीसीसीआयने भारताचा संघ जाहीर केला आणि यावेळीही काही धक्कादायक निर्णय पाहायला मिळाले. सगळ्यात महत्वाची बाब म्हणजे विराट कोहलीच्या खास मानल्या जाणाऱ्या खेळाडूचं पुन्हा एकदा भारतीय संघात कमबॅक झालं आहे.
भारत आणि न्यूझीलंड यांच्यात तीन वनडे सामन्यांची मालिका ११ जानेवारीपासून सुरू होणार असून १८ जानेवारीपर्यंत चालणार आहे. त्यानंतर दोन्ही संघांमध्ये टी-२० मालिकाही खेळवली जाणार आहे. आज बीसीसीआयची महत्वाची बैठक पार पडली आणि त्यातच हा वनडे संघ जाहीर करण्यात आला.
या मालिकेसाठी शुभमन गिलची संघात जोरदार पुनरागमन झालं आहे. मागील मालिकेत दुखापतीमुळे तो खेळू शकला नव्हता, पण आता तो पूर्णपणे तंदुरुस्त असून त्याच्यावर थेट कर्णधारपदाची जबाबदारी देण्यात आली आहे.
याशिवाय आणखी एक मोठी बातमी म्हणजे वेगवान गोलंदाज मोहम्मद सिराजचं कमबॅक. काही काळ त्याला वनडे संघाबाहेर ठेवण्यात आलं होतं, पण आता न्यूझीलंडविरुद्धच्या मालिकेसाठी त्याला पुन्हा संधी देण्यात आली आहे. सिराजला विराट कोहलीचा खास खेळाडू मानलं जातं. (IND vs NZ)
भारताचा वनडे संघ असा आहे –
शुभमन गिल (कर्णधार), रोहित शर्मा, विराट कोहली, केएल राहुल (यष्टीरक्षक), श्रेयस अय्यर (उपकर्णधार), वॉशिंग्टन सुंदर, रवींद्र जडेजा, मोहम्मद सिराज, हर्षित राणा, प्रसिद्ध कृष्णा, कुलदीप यादव, ऋषभ पंत (यष्टीरक्षक), नितीशकुमार रेड्डी, अर्शदीप सिंग आणि यशस्वी जयस्वाल.
महम्मद शमीने २०२५ च्या चॅम्पियन्स ट्रॉफीनंतर भारतासाठी एकही सामना खेळलेला नसला, तरी देशांतर्गत क्रिकेटमध्ये बंगालकडून त्याने चांगली कामगिरी केली आहे. मात्र तरीही यावेळी त्याची निवड झाली नाही.
हार्दिक पंड्या संघात नसल्यामुळे अष्टपैलू म्हणून शिवम दुबे किंवा नितीशकुमार रेड्डीला संधी मिळेल, असा अंदाज होता. त्यापैकी नितीश रेड्डीला संघात स्थान मिळालं आहे.
कर्नाटकचा देवदत्त पडिक्कल याचं नावही चर्चेत होतं. विजय हजारे ट्रॉफीत त्याने चार सामन्यांत तीन शतकांसह ४०६ धावा केल्या होत्या. पण शुभमन गिलच्या पुनरागमनामुळे पडिक्कलला सध्या तरी वाट पाहावी लागणार असल्याचं दिसतंय.
