Yawat News : यवत, ता.३० : भांडगाव (ता. दौंड) ग्रामपंचायतीच्या उपसरपंचपदी तुषार राजू शेंडगे यांची बिनविरोध निवड करण्यात आली.
मावळते उपसरपंच सिंधु हरपळे यांनी आपल्या पदाचा कार्यकाल संपल्यानंतर राजीनामा दिला होता. राजीनामा दिल्याने सदर पद रिक्त झाले होते. या पदाची निवडणूक प्रक्रिया सरपंच संतोष दोरगे यांच्या अध्यक्षतेखाली नुकतीच पार पडली. या निवडणुकीत तुषार शेंडगे यांचा एकमेव अर्ज आल्याने, सरपंच संतोष दोरगे यांनी शेंडगे यांची उपसरपंचपदी बिनविरोध निवड झाल्याची घोषणा केली.
उपसरपंचपदी बिनविरोध निवड
दरम्यान, उपसरपंचपदी तुषार शेंडगे यांची बिनविरोध निवड होताच, कार्यकर्त्यांनी फटक्याची आतिषबाजी व गुलालाची उधळण करून जल्लोष साजरा केला. तर उपस्थित मान्यवरांच्या हस्ते नवनियुक्त उपसरपंच शेंडगे यांचा सत्कार करण्यात आला.
यावेळी दौंड पंचायत समितीचे माजी सभापती मधुकर दोरगे, माजी उपसभापती नितीन दोरगे, विद्यमान सरपंच संतोष दोरगे, ज्येष्ठ ग्रामपंचायत सदस्य लक्ष्मण काटकर, प्रमोद दोरगे, माजी उपसरपंच सिंधु हरपळे रुपाली खळदकर, नीलम दोरगे, नंदा जाधव, ग्रामविकास अधिकारी राजेंद्र कदम, विजय शेंडगे, राहुल खळदकर, अमित दोरगे व ग्रामस्थ मोठ्या संख्येने उपस्थित होते.
यावेळी बोलताना नवनिर्वाचित उपसरपंच तुषार शेंडगे म्हणाले,“सरपंच संतोष दोरगे यांनी माझ्यावर विश्वास ठेऊन मला उपसरपंचपदाची संधी दिली आहे. यामुळे आगामी काळात सरपंच व सर्व सहकारी ग्रामपंचायत सदस्य यांच्या माध्यमातून सर्वाना बरोबर घेऊन अत्यावश्यक असलेली सर्व कामे मार्गी लावण्यासाठी प्रयत्न करणार आहे.”
