पिंपरी-चिंचवड: चाकण नजिक कडाचीवाडी (ता. खेड) गावच्या हद्दीत दुर्दैवी घटना घडली. येथील पाझर तलावात पोहायला गेलेल्या ४ अल्पवयीन मुलांचा बुडून मृत्यू झाल्याची धक्कादायक घटना घडली आहे. ही घटना शनिवार (दि. ३१ मे) दुपारी तीन वाजण्याच्या सुमारास घडली. स्थानिक नागरिकांच्या मदतीने पोलिसांनी चिमुरड्यांचे मृतदेह पाण्याबाहेर काढले.
ओमकार बाबासाहेब हंगे (वय १३ वर्ष, सध्या रा. मार्तंडनगर, मेदनकरवाडी, मूळ रा. हंगेवाडी, ता. केज, जि. बीड), श्लोक जगदीश मानकर (वय १३ वर्ष, सध्या रा. मेदनकरवाडी, मूळ रा.धनवडी, ता.वरुड, जि.अमरावती), प्रसाद शंकर देशमुख (वय १३, सध्या रा. मेदनकरवाडी, मूळ रा.अंबुलगा, ता.मुखेड, जि.नांदेड), नैतिक गोपाल मोरे (वय १३ वर्ष, सध्या रा. मेदनकरवाडी, मूळ रा. बुलढाणा झरी बाजार,ता.अकोट, जि.अकोला) असे बुडून मृत्युमुखी पडलेल्या शाळकरी चिमुकल्यांची नावे आहेत.
याबाबत अधिक माहिती अशी की, मृत चौघेही मुलं शनिवारी (दि.३१मे) राहत्या घरातून सकाळी ११ वाजण्याच्या सुमारास चाकणजवळील कडाचीवाडी गावच्या हद्दीतील पाझर तलावामध्ये पोहण्यासाठी गेले होते. तेंव्हा या सर्वांचा पाण्यात बुडून मृत्यू झाला. दुपार होऊनही हे चौघे जण घरी न परतल्याने नातेवाईकांनी त्यांचा परिसरात शोध घ्यायला सुरुवात केली. त्यानंतर कडाचीवाडी गावच्या हद्दीतील पाझर तलावाच्या काठावर या मुलांच्या चपला व कपडे आढळले.
पोलिसांनी स्थानिकांच्या मदतीने बुडालेल्या मुलांचे मृतदेह पाण्याबाहेर काढले. घटनास्थळाचा चाकण पोलिसांनी पंचनामा केला असून, याप्रकरणी आकस्मिक मृत्यू अशी नोंद करण्यात आली आहे. दरम्यान, मृत चौघांचेही मृतदेह चाकण ग्रामीण रुग्णालयात विच्छेदनासाठी पाठवण्यात आले. त्यावेळी मुलांचे मृतदेह पाहून नातेवाईकांनी एकच हंबरडा फोडला.
चाकण पोलीस ठाण्याचे वरिष्ठ पोलीस निरीक्षक प्रमोद वाघ यांच्या मार्गदर्शनाखाली पुढील तपास सुरू आहे.
