मंचर: भावडी व थोरांदळे (ता. आंबेगाव) येथील पाइन मळा येथे विहिरींमध्ये पडल्याने दोन बिबट्यांचा मृत्यू झाला. भावडी येथे भक्षाच्या मार्गावर असलेल्या बिबट्याचा विहिरीत पडून मृत्यू झाला. रात्री विहिरीचा अंदाज न आल्यामुळे बिबट्या विहिरीत पडला. अंदाजे साडेपाच वर्षाचा नर जातीचा हा बिबट्या असल्याची माहिती वनविभागाने दिली आहे.
भावडी येथील अंबिर शेत परिसरातील संजय बबनराव कातळे, वसंत बबनराव कातळे यांच्या विहिरीमध्ये मृत बिबट्या असल्याची माहिती गोरक्षनाथ नवले यांनी वनविभागाला दिली. दरम्यान, वनविभागाचे कर्मचारी व गावडेवाडी येथील बिबट शीघ्र कृती दलाचे सदस्य यांनी घटनास्थळी भेट देऊन मृत बिबट्याला विहिरीतून बाहेर काढले. पशुधन वैद्यकीय अधिकारी यांनी या बिबट्याची तपासणी केली. मंचर वनपरिक्षेत्र अधिकारी विकास भोसले यांच्या आदेशाने सदर बिबट्याचे अवसरी घाट येथील रोपवाटिकेत अग्नि दहन केले.
दरम्यान, दुसरी घटना थोरांदळे येथील पाइन मळा येथे बाळू विठोबा टेमगिरे हे आपल्या शेताला पाणी देण्यासाठी विहिरीवरील मोटार चालू करण्यासाठी गेले असता त्यांना विहिरीमध्ये एक बिबट्या व एक मांजर आढळून आली. त्यांनी तात्काळ ही माहिती वनपाल प्रदीप कासारे यांना दिली. माहिती कळताच मंचर वनपरिक्षेत्र अधिकारी विकास भोसले, वनपाल प्रदीप कासारे व इतर वन कर्मचाऱ्यांनी घटनास्थळी भेट घेऊन मृत बिबट्याला बाहेर काढले. पशुधन वैद्यकीय अधिकारी डॉ. अजय कोल्हे यांनी मृत बिबट्याचे शवविच्छेदन करून वनविभागाने वनपरिक्षेत्र अधिकारी विकास भोसले यांच्या मार्गदर्शनाखाली सदर दीड वर्षाच्या मादी बिबट्याचे थोरांदळे येथील वनविभागाच्या हद्दीत अग्नि दहन करण्यात आले. सदर बिबट्याची मादी साधारण दोन दिवसापूर्वीच मृत पावली असल्याचा अंदाज वनपरिक्षेत्र अधिकारी भोसले यांनी व्यक्त केला आहे.
